Panahon ra'y nasayod
USA ang pagdagan sa labing epektibo nga ehersisyo alang sa maayo nga panglawas. Matod pa, ang tambok mokuyos ug ang masakiton mohimsog kon kanunayon ang pagdagan. Wala’y makalalis niini ug mismong mga eksperto sama sa mga doktor mao kini ang itambag.
Natural, sayod niini ang presidente sa Cebu Ultrarunners Club ( CUC) nga si Tony Galon. Apan gipasabot ni Galon nga wala niya naamguhan ang ka importante sa pagdagan kon wala nipanaw sa laing kalibutan ang iyang amahan niadtong 2008 sa sakit nga colon cancer.
“Ang usa gyud nga rason nga nagdagan ko kay namatay ang akong papa sa cancer... colon cancer. Usa man gud ang exercise nga maka- prevent sa cancer,” matod ni Galon. “So after namatay ang akong papa, nag- start nako og dagan.”
Gipasabot ni Galon nga dali ra niyang gikahiligan ang pagdagan gumikan kay mao man sab kini ang hilig sa iyang asawa nga si Alfie. Gani mas unang nalambigit si Alfie ning maong klase sa paugnat sa kusog. Nidugang si Galon nga matag duha o tulo ka mga buwan, mo- donate sab siya og dugo nga matod niya makatabang sab alang sa maayong panglawas. Nahimo na siyang regular donor sa Red Cross.
Ang pagtaliwan sa iyang amahan nakatanom og kabilin ngadto kang Galon nga kinahanglang mag-amping sa panglawas sa kanunay. Gikan niadtong masulob-on nga kasinatian, nagsige na’g dagan si Galon hangtod karon. Dili na masubay ang distansya sa iyang gidaganan. Dili na sab maihap ang running
events nga iyang gisalmutan. Gikan sa 72 kilos kaniadto, si Galon aduna na la’y gibug-aton nga 62 kilos sa pagkakaron.
LABING UNANG LUMBA
Nagsugod si Galon pag-apil og running events niadtong Disyembre 9, 2009. Sa ngadtongadto, dili na siya makuntento og mugbo nga distansya. Gusto siya nga mas layo ang iyang daganan nga sa usa lang ka event, mahilis na ang lapalapa sa iyang sapatos gumikan sa gilayon. Tungod niini, nasulod sa alimpatakn ni Galon nga tukoron ang CUC. Nagkadaghan ang mga miyembro sa grupo ug nag-organisar na sab kini og mga ultra marathons. Matod pa ni Galon nga labing ubos, 10 na ka ultra marathons ang iyang nasalmutan.
Sa kasamtangan, ang labing lisod niyang nahuman mao ang SN250 event sa miaging tuig nga nanukad sa lungsod sa Santander ug misangko sa lungsod sa Daan Bantayan. Aduna kini gilay-on nga 250 kilometros. Nahuman ni Galon ang lumba sa oras nga 46:58:06 o hapit duha ka mga adlaw nga igo na alang sa ikalimang puwesto. Ning maong tahas, kaduha ra natulog si Galon ug tag medya oras ra ang iyang matag hinanok. Giangkon ni Galon nga dili kalikayan, mahimutang sa delikadong sitwasyon ang partisipante sa ultra marathon. Aduna’y gukdon og iro ang runner, adunay pasingitan og hubog hilabi na sa lawom nga gabii ug kuyaw sab maaksidente sa dalan. Wala pa’y labot niini ang kagutom ug kakapoy.
Kining tanan gikaya ni Galon. Iyang nahinumdoman nga dihang miapil siya og ultramarathon sa Hongkong sa miaging tuig, nakasuway siya nga mokaon na lang og dahon sa bayabas gumikan sa kagutom. Niadtong higayuna, nagamit niya ang iyang nakat-unan sa programa sa Discovery Channel nga giulohan og “How to Survive.” Kon dili tanan, kadaghanan sa ultra
marathons wala’y ganting salapi apan dili kini panumbalingon sa sama ni Galon. Gipasabot niya nga ang iyang labing ganahan sa ultra marathon mao ang adventure.
Kutob sa iyang makaya, ang 44 anyos nga si Galon wala’y planong mohunong og dagan. Karong Hunyo 11, 2014 mas lisod nga tahas ang iyang sagubangon – ang SN280. Manukad gihapon kini sa lungsod sa Santander apan ning higayuna, mas taas ang distansya ug mahuman kini sa siyudad sa Bogo. Aduna kini gilay-on nga 280 kilometros. Tipik sa pagpangandam ni Galon mao ang five petals nga iyang gisunod gikan niadtong Hunyo 25. Sa matag petal modagan siya og 60 kilometros matag adlaw. Iya kining gihimo sulod sa lima ka mga adlaw. Sa preparasyon pa lang, dili na lalim ang gihimo ni Galon. Sa himsog niyang panglawas, nalantawan ni Galon nga dugay pa siyang magsige og dagan. Kon kanus-as siya mohunong, panahon ra’y nasayod.