SALESLADY GI-GANG RAPE

Atubangan sa iyang uyab sa kalibunan sa Barangay Pitalo, San Fernando

USA ka 21-anyos nga saleslady gi- gang rape atubangan sa iyang uyab sa tulo ka mga silingang ‘adis-adis’ sa hilit nga dapit sa Barangay Pitalo, lungsod sa San Fernando, Sugbo niadtong Dominggo sa alas 3:00 sa kaadlawon.

Si Maria (dili tinuod ngalan), 21, dalaga, nagpuyo sa Pitalo ug saleslady sa usa ka department store sa dakbayan sa Carcar, nagkurog ug naghilak dihang nisumbong sa kapulisan sa San Fernando.

Si Chief Insp. Sarah Jane Recla, hepe sa San Fernando Police Station nga nahinabi sa dySS Super Radyo ug Sun.

Star Superbalita, nagkanayon nga si Maria uban sa uyab nga si Juan (dili tinuod ngalan), 25, pintor ug taga lungsod sa Aloguinsan.

Ang mga suspek sa pagpanulis ug pagpanglugos mao sila si Kevin Cabrera, 23, ulitawo sakop sa Crips Gang nga nabilanggo na kaniadto, ug Arnel Ladica 29, giingong pusher ug laing usa nga wala pa mailhi.

Ang duha nadakpan sa ilang panimalay niadtong Lunes sa alas 11:00 sa buntag human sa gipahigayong hot pursuit operation sa kapulisan ug positibong gitudlo sa biktima.

Asoy ni Recla nga niadtong Dominggo sa kaadlawon, si Maria gihatud ni Juan sa ilang balay human kini nibisita sa kaniya sa iyang gitrabahoan sa Tayud, Lilo-an.

Sa pag-abot nila sa Pitalo, naglakaw ang manag-uyab human distansiya sa ilang balay paingon ngadto sa bukid dihang nasugatan ang tulo ka mga suspek.

Gitulis sila ug gikuha ang ilang duha ka cellphones, ug P50 nga kuwarta ni Marian.

Wala silay nahimo human nagpasulabi ang ilang kahadlok sanglit nagdala og mga armas ang mga suspek kinsa gihulagway nga notadong pusher ug maldito sa lugar.

Si Recla niingon nga nagtuo ang manag-uyab nga biktima nga nahuman na ang ilang kalbaryo pero gipangutanan sila sa mga suspek kon manag-uyab silang duha.

Nitubag usab sila nga manag-uya ug dinhi, ang mga suspek nimando kanila nga maghubo aron maghilawas sa ilang atubangan.

Nibalibad ang mga biktima sa mando sa mga suspek apan gihulga silang patyon hinungdan nga napugos sila sa paghubo sa ilang mga sapot samtang gidala sa kalibunan sa maong dapit.

Ang duha naghilak nga nangaliyupo sa mga suspek nga dili maghilawas apan, kalit nga sila si Cabrera ug Ladica mao ang ninglugos kang Maria.

Samtang, ang wala mailhing silingan maoy nagbinaklid kang Juan gipahapa sa yuta, gitionan og armas ug gipatanaw sa paghilawas sa mga suspek ngadto sa uyab.

“Gipatan-aw gyud siya, mipingon unta ang iyang mga mata pero gipabuka gitionag armas nga motanaw sa iyang uyab nga nga gilugos,” dugang ni Recla.

Si Juan nibutyag nga nagtinguhang mosukol ug naghikaphikap sa yuta sa pamasin makakuhag bato pero, wala siyay napunitan samtang nagkurog sab siya sa kahadlok.

Human sa krimen nagbakho ang mga biktima nga nipauli sa padulong sa balay nila ni Maria, pero gibauran sila sa mga suspek nga patyon kon mosumbong.

Sa pag-abot sa balay, igo lang nitug-an si Maria sa iyang mama nga gitulis sila samtang naglakaw padulong mopauli.

Ug niadtong Lunes sa buntag, si Maria uban sa iyang uyab nipahibalo niini sa chief security sa department store nga gialagaran, kinsa nitambag kanila nga motaho dayon sa San Fernando Police.

Si Recla niingon nga dihang nisugilon ang mga biktima, wala sila maglangay ug nipahigayog hot pursuit operation hinungdan sa pagkasikop sa mga suspek nga sa positibong gitudlo sa mga biktima.

Ang mga suspek pulos ninghimakak sa alegasyon.

Ang biktima gipahiling sa kapulisan sa Pink Room sa Vicente Sotto Memorial Medical Center (VSMMC).

Ang kasong robbery with rape gipasakana batok sa mga suspek kagahapon.

Samtang, si Juan nipadayag nga bisan pa man sa nahitabo, andam gihapon siyang mangasawa ang iyang hinigugma si Maria.