ROAD-SHARING SA SIYUDAD ILUSAD KARONG DOMINGGO
KATUNGA sa mga karsada sa Osmeña Boulevard, Fuente Osmeña, Escario St., Gen. Maxilom Avenue ug Gorordo Avenue ang dili paagian og mga sakyanan karong Dominggo sa hapon hangtod sa gabii.
Si architect Joseph Michael “Yumi” Espina, chairman sa subcommittee on integrated development and special planning sa Mega Cebu, nibutyag nga kini tipik sa road-sharing activity nga gitawag og “Green Loop.”
Si Marc Canton, usa sa mga convenor sa Movement for Livable Cebu, nipahibawo nga dili paagi-an og mga sakyanan ang katunga sa mga lane sa nahisgotang mga dapit gikan alas 3 sa hapon hangtod sa alas 7 sa gabii.
Siya nipasabot sa road sharing, ang inner lane gitagana alang sa mga tawo nga maglakaw, person with disabilities, bikers ug skate boarders. Ang outer lane alang sa twoway traffic sa mga sakyanan.
Si Espina, kinsa usa usab sa mga convenor sa MLC ug dean sa College of Architecture and Fine Arts sa University of San Carlos, nipasabot nga tumong niini nga maminosan ang gidaghanon sa mga sakyanan nga magdagan sa karsada sa urban centers nga naglangkob sa tulo ka mga siyudad sa Sugbo, Mandaue, Lapu-Lapu ug lungsod sa Cordova.
“Kini bang reduction of the vehicular links and then increasing the sidewalks, it is really a change of mind set ba. Usbon nato ang paghunahuna, mag-angay ta sa dan,” pagpasabot ni Espina atol sa 888 News Forum sa Marco Polo Plaza kagahapon.
Matod niya, ang Sugbo ang adunay labing daghang mga sakyanan sa nasod nga niabot na og 625,000 units base sa narehistro niadtong 2012, hinungdan sa grabeng kahuot sa dagan sa trapiko.
“Maglisod ang development sa city if we do not take care of our traffic. This Sunday, this is going to be an experiment of the Green Loop,” dugang niya.
Si Canton nidugang og 95 porsiyento sa mga tawo ang walay mga sakyanan hinungdan nga makiangayon lamang nga padakan ang sidewalk alang sa mga pedestrian.
Ang eksperimento unang himuon sa dakbayan sa Sugbo.
Siya nidugang ang kalihokan gipaluyohan sa kagamhanan sa siyudad sa Sugbo, mga pundok sa mga PUJ drayber ug Mega Cebu.
Suma pa ni Canton nga mismo ang mga pundok sa mga PUJ driver ang nisugyot nga mohunong lamang sila sa mga “designated stop” o matag 400 metros.
“Dili mo- stop bisan asa lang, kinahanglan mo- stop sila sa designated stop lang,” dugang niya.
Human sa eksperimento, ang mga tawo pangutan-on sa ilang komento bahin sa road-sharing nga maoy himuon nga basehanan alang dugang aksiyon.
Si Espina nidugang nga ang Green Loop gitun-an karon sa mga tinun-an sa CAFA sa USC.
Human sa kalihokan, adunay himuon nga concert sa mga banda sa Fuente Osmeña Circle.