Notadong pusher nakaipsot

GIILANG drug pusher ang nakaipsot atol sa gihimong ronda sa ilang panilamay kagahapon sa alas 6:00 sa buntag sa Sitio Dita, Barangay Pulangbatu, dakbayan sa Sugbo.

Duha sa iyang kauban ang nangadakpan ug nakuhaag binultong shabu nga gibana-banang mokantidad og kapin sa P300,000.

Wala naigkita ang giingong level 2 drug pusher nga si Gerome Miñoza, hingkod ang panuigon kinsa mibiya sa iyang panimalay ug giingong milarga sa Mindanao dihang naabot ang mga operatiba sa Regional Anti-Illegal Drugs Special Operations Task Group (RAIDSOTG-7).

Si Insp. Joey Bicoy, team leader sa raiding team sa RAIDSOTG-7 mitug-an sa mga tigbalita nga dala nila ang search warrant nga gi-siyu ni Judge Gilbert Moises, sa Regional Trial Court (RTC-7) Branch 18.

Pero na-surpresa sila kay sa pag-abot nila sa panimalay ni Miñoza nga bungalow- type orange ang kolor dunay nakabutang sa gawas nga “for rent.”

Niini gikatakdang mopahigayon silag imbestigasyon aron pagsuta kon wala ba mo- leak ang ilang operasyon batok ni Minoza ug posibling dunay nakapindot niini.

“Dinagko gyud ni iyang pagpamaligya. Kung sa tindahan pa, wholesale,” sumala pa ni Insp. Bicoy.

Nasikop nila si Lord Maraño, 26, ang righthand ni Miñoza, ingon man si George Casimero, 37, kinsa kadudahan kaayo ang panglihok niini nga nigawas sa panimalay.

Si Maraño, nakuhaag usa ka gamayng pakite sa shabu, samtang si Casimero, nakuhaag medium nga putos sa shabu.

Nakuha sab nila ang upat ka medium nga putos didto sa payag nga gipanag-iya ni Miñoza.

Si Bicoy, mibana-banang motimbang sa 27.5 gramos nga mobalor sa P324,500 mil.

Si Maraño ug Casimero nga gikuhaan sa ilang habig sa mga sakop sa media hugtanong nanghimakak sa pasangil nga nalambigit sila sa ginadiling druga.

Si Maraño, miingon nga iyang bayaw si Miñoza ug giblin lang siya sa panimalay niini aron mo-atiman sa farm ingon man kahayupan samtang si Casimero, mibutyag nga padulong na siyang mopauli human siya naghatud sa iyang asawa.

Si Varrez Jogie Miñoza, 21, pag-umangkon nga ang iyang uyo-an, iyang tiya ug ig-agaw milarga ngadto sa Aurora, Zamboanga Del Sur.