Leon Kilat dili diay sakop sa KKKDA: Datu Sibuyan
DILI konektado ug walay labot sa tribu nga Kinatas-ang Kahugpungangan sa Kapupud-an Datu Alimaong (KKKDA) ang nagpailang Alimaong nga nakamugna og kalisang ug kagubot human sila nagbitbit og tag-as nga kalibre sa armas didto sa barangay Agsungot, dakbayan sa Sugbo.
Ang Alimaong usa ka generic name nga nagkahulogan isip protector, defender, guardian sa tribu ug komunidad diin wala mahisubay sa maong katuyuan ang gibuhat sa grupo ni Datu Bontito o Leon Kilat nga maoy na-engkwentro sa kapulisan didto sa Agsungot nga napatyan og sakop.
Ang KKKDA nga gipangulohan ni Datu Sibuyan nagkanayon nga gusto nilang limpyohan ang ilang grupo gikan sa pagbulingbuling ni Datu Bontito kinsa nalambigit sa kanhi mga kontrobersiya didto sa Lapu-Lapu ug Talisay City kansang mga sakop nangapriso.
Ang KKKDA rehistrado sa Securities and Exchange Commission subay sa Republic Act 8371 kun The Indigenous Peoples Right Act nga konektado sa Anti Crime and Terrorism Thru Community Involvement and Support.
Apil usab sila sa centennial force, rebolusyonaryong alyansang makabayan, national auxiliary chaplaincy of the Philippines, Theology University, Visayas Federation of Corruption Prevention Unit ug citizen crime watch uban sa paghimo og outreach program ug blood donation.
Matod pa ni Datu Olisi nga kanhi ilang sakop si Leon Kilat apan ilang gitangtang sa KKKDA niadtong tuig 2010 sanglit ang iyang prinsipyo wala masubay sa katuyuan sa ilang organisasyon.
Naghimo og kaugalingon niyang grupo si Kilat nga gitawag og Kinatasang Kahugpungan sa Kapupud-an Alimaong Higaonon Tribe.
Dugang niya naanad na si Leon Kilat sa pagpangilog og yuta nga dakong supak sa ilang organisasyon.
Si Bise Mayor Edgardo Labella niingon nga samang grupo ang kanhi nangangkon sa propiedad sa Marco Polo Hotel ug didto sab sa barangay Lusaran ug Cambinocot nga bukiran sa siyudad.
Usa ka kapitan sa bukid nialegar nga ang grupo ni Bontito mangrecruit og sakop ug pasaligan nga hatagan og yuta ug maoy mopaeskwela sa ilang mga anak.
Nibutyag si Olisi nga tuyo sa KKKDA nga makaangkon og kaangayan ang mga tawo nga dinaogdaog ug gihikawan sa ilang katungod ug pakigkumbuya sa gobiyerno.