Catchment basins gisugyot sa MCWD

PLANO karon sa Metropolitan Cebu Water District (MCWD) ang pagbutang og mga catchment basins o estraktura diin mopundo ang tubig aron pagsulbad sa problema sa baha ug sa kakuwang sa tubig dinhi sa syudad sa Sugbo.

Si MCWD General Manager Ernie Delco nagkanayon nga sa pagkakaron naghinay-hinay na og balhin ang MCWD sa surface water kun mga dam gikan sa ground water o mga tubig gikan sa ilawom sa yuta susama sa mga tabay.

Ang manager sa Environment Water Resources Department sa maong buhatan nga si Engr. Lasaro Salvacion mitataw nga 37 porsyento lang sa kibatibuk-ang ground water ang supply sa MCWD samtang ang laing 63 porsyento anaa sa pampribado nga mga kompanya.

Dugang ni Salvacion nga dinhi sa Sugbo ug sa kasikbit nga lungsod ug dakbayan nga gi-supplyan sa MCWD, moabot ngadto sa 164,000 ka cubic meter matag adlaw ang makuha gikan sa ground water samtang 40,000 ka cubic meter matag adlaw gikan sa surface water.

“Ang ibabaw sa Cebu City naay mga rivers nga pwede ma- develop, ma- design ang system. It can help,” matod ni Delco.

Dugang niya nga kinahanglan usab nga anaay pagahimuon ang matag panimalay mahitungod niining problema sa baha susama sa paghimo og mga catchment basins sa tagsa-tagsa ka panimalay gamit ang baril kung diin mamahimo kining magamit alang sa pagbubu sa tanom og pang- flush sa atong mga kasilyas.

Kini nga lakang supportado usab sa Department of Environment and Natural Resources (DENR) 7 diin gidasig ang Local Government Unit (LGU) nga ilakip ang catchment basins project sa ilang tagsa-tagsa ka mga barangay development plan.

Si Dr. Eddie Llamedo, chief sa regional public affairs office sa maong buhatan, miingon nga usa sa lakang nga ilang gibuhat mao ang pag- require sa mga land development project nga ilakip sa ilang master plan ang pagpananom og mga kahoy.