Kawani nagpositibo na usab sa paggamit og drugas

ORMOC CITY - Gihuptan na karon sa lokal nga kagamhanan ning dakbayan ang resulta sa 19 ka kawani nga gipaubos sa ikaduhang hugna sa ‘surprise and random drug test’ sa milabayng semana.

Ang panguloo sa Human Resources Office nga si Adelaida Biaculo niingon nga duna gihapoy positibo nga kawani apan nagdumili kini sa pagsulti sa mga pangalan niini ug sa opisina nga gitrabahoan.

“Mas maayo seguro nga si attorney (city administrator) nalang imong pangutan-on kay kasab-an lagi mi,” pasabot ni Biaculo.

Si City Administrator Francis Pepito nisugilon sa Sun.

Star Superbalita nga di lang nila ipagawas ang mga pangalan alang sa “confidentiality purposes”.

Una na nga gipamahayag ni Biaculo nga 20 ka kawani ang gipaubos sa sa ikaduhang hugna sa drug test apan sumala sa drug testing center nga 19 lang ang nitungha niini.

Sa milabayng buwan, gipahigayon ang unang hugna sa surprise and random drug test ngadto sa 20 ka kawani diin 15 niini regular ug lima ang casual.

Migawas sa confirmatory result nga unom ka regular nga kawani ang tiggamitan og ilegal nga drugas.

Si Pepito nisaad nga imbestigaron sa Disciplinary Action Committee (DAC) ang unom ug desisyonan kon unsay silot nga ipahamtang.

Alang kang Mayor Edward Codilla nga taktakon sa pwesto ang mga kawani nga mapamatud-an nga mga adik.

Apan, si Pepito mosusi pa sa balaod sa Department of Interior and Local Government (DILG) ug Civil Service Commission (CSC) kon unsa nga silot ang angay ipatuman.

Sa paghimo ning balita, padayon gihapon nga nagtrabaho ang mga nagpositibo sa drug test.

Wa pay aksyon nga gihimo ang kagamhanan sa dakbayan sa Ormoc kon unsay ilang buhaton ning ilang mga mga empleyado nga nasakpan nga positibo sa paggamit sa gidiling drugas.

Nibahad ang kagamhanan nga ang mga sad-an manubag diin tinguha nilang malimyohan sa mga adik ang ilang kagamhanan.