Lalake natusaktusak sa mga bala, patay

DUMAGUETE CITY - Wa na makaabot sa tambalanan ang usa ka lalake human gipusil sa wa mailhing mga suspek niadtong Lunes human kini nahiagom og daghang samad pinusilan sa iyang kalawasan didto sa Purok Mutya, Barangay Calindagan ning dakbayan.

Ang biktima giila nga si Nicoli Hernando, 39, minyo ug molupyo sa Capitol Area sa samang dakbayan.

Sumala sa imbestigasyon sa kapulisan nga ang biktima ang nagsakay sa iyang motorsiklo nga usa ka rouser nga Kawasaki kolor itom.

Ang biktima padulong sa lugar sa nahitaboan ug dihang sa pagabot niini wa makabantay ang biktima nga gipauwanan kini sa bala sa armas ug diha kini maigo sa nagkadaiyang parte sa kalawasan hinungdan nga nabugtuan kini sa iyang kinabuhi.

Gisuwayan pagdala sa Silliman University Medical Center (SUMC) ang biktima apan gideklarar kini sa mga doctor nga patay na dihang miabot.

Dugang pakisusi sa pagpamusil sumala pa nga ang duha ka suspek nga mga lalake ang nagpaabot na kini sa lugar nga moabot ang biktima.

Nakuhang ebidensiya sa nahitaboan mao ang mga kabhang sa wa pa matinong kalibre sa armas ug laing usa ka bala sa kalibre .45 nga armas, motorsiklo, mga nagkadiyang cards ug nakuhaan usab ang biktima sa usa ka transparent plastic sachet nga gituhuang gisudlag shabu.

Sapagkakaron dugang imbestigasyon ang gihimo sa kapulisan sa Dumaguete aron pag-ila sa mga suspek ingon man pagtino sa motibo niini.