Mga classroom gitugyan sa Lopez Group sa Leyte

ORMOC CITY - Baynte kwatro ka mga typhoon resilient classrooms ang pormal nga gi- turn over sa Lopez Group ngadto sa napiling tunghaan nga apektado sa super typhoon Yolanda.

Ang walo ka classroom naa sa New Ormoc City National Highschool (NOCNHS), tulo sa barangay Matlang Isabel ug tulo sa San Joaquin National Highschool sa Palo.

Gawas sa nauna, 10 ka bag-ong giayo nga classrooms didto sa Barangay Milagro ang gi- turn over usab kagahapong adlawa.

Pasado alas 9:00 kagahapon sa buntag, gi- turn over sa Lopez Group ang duha ka building nga dunay upat upat ka classroom didto sa NOCNHS.

Gisunod pag- turn over ang bag-ong giayo nga lima ka building diin matag building dunay duha ka classrooms didto sa Milagro.

Nianang hapon gi-turn over ang tulo ka classrooms didto sa Matlang, Isabel, Leyte ug karong adlawa i- turn over ang laing tulo ka classrooms sa San Joaquin, Palo.

Gibana-banang 7,000 ka mga tinun-an ang makabenipisyo sa mga classroom.

Ang mga classroom giseguro nga lig-on pagkahimo diin makaya niini ang 250 kilometers per hour nga gikusgon sa hangin nga mao usab ang gihimo sa Department of Public Works and Highways sa mga typhoon resilient classrooms.

Nasayran nga mas doble pa ang gibag-on sa bungbong itandi sa daan nga mga lawak, gipatas-an usab ang kisame ug lagpad ang mga bentana aron mas hayahay sa mga tinun-an.

Nikabat sa P1.2 milyones ang kantidad sa matag classroom sa NOCNHS, Matlang ug Palo samtang P6.7 milyones ang kantida sa pag-ayo sa mga classroom sa Milagro.

Padayon ang pagtukod sa uban pang classrooms sa sekondarya.

Si Ricky Tantoco sa Energy Development Corporation niingon nga gawas ning mga naunang classrooms duna pay ubayubay ang isunod paghatag.