Media sa Sugbo
NING tungtunga sa kasaulogan sa Cebu Press Freedom Week, nakita gihapon ang kainit ug kadasig sa mga sakop sa media sa Sugbo sa pakighiusa sa mga kauban sa buhat sa mga kalihokan sa semana.
Dili lang pagbalik-lantaw sa pakigbisog sa mga mamahayag panahon sa dulom nga katuigan dihang gideklarar ni anhing Presidente Ferdinand Marcos ang Martial law niadtong Septiyembre 21, 1972 ug ang pagsaulog sa pagtumaw sa demokratikong espasyo human napalagpot ang diktador sa Malacañang niadtong 1986, ang Cebu Press Freedom Week mitutok sa mas undanon ug makahuluganong pagpakabana tukma sa panahon.
Ang kasaulogan nagpalambo sa relasyon sa mga sakop sa tradisyonal nga tri-media ug lakip na sa bag-ong social media. Nagpataas sa ang-ang sa propisyon pinaagi sa pagkat-on sa bag-ong nagtumaw nga plata-porma sa media subay sa pag-uso sa teknolohiya sa internet nga dili mawala ang pagsunod sa batakang mithi sa pamahayag sama sa patas ug kasaligan nga panuwat ug pamahayag.
Samtang, ang kahiusahan sa media sa Sugbo padayong ehemplo sa tibuok nasod ug lig-ong puwersa sa pagharong sa mga isyu ug mga problema nga naghulga sa kinatibuk-ang industriya. Busa, ang media sa Sugbo giila nga labing gawasnon sa nasod.
Nasayod kita nga importante ang gawasnong media alang sa pagpanalipod sa demokratikanhong nasod, dili lang tighatod sa kasayoran ug kalingawan sa publiko, apan aktibong tigbantay sa mga nagdumala sa renda sa kagamhanan.
Sa pikas bahin, katungdanan sa matag sakop sa media nga pagbantay sa iyang han-ay aron dili usab maabusohan ang halandong gahom sa prensa.