Pagtuo ug kaadunahan

BUHI gihapon ang panultion nga ang pagtuo makairog og bukid. Kining lindog mopuno sa pagingon nga ang mga bulawan sa bukid makawot sa pagtuo.

Niadtong miaging Domingo uban sa pipila ka mga sakop sa pamilya misimba ko sa Marian Hills nga anaa mahimutang sa sityo Lindugon, Simala, Sibonga, Cebu.

Kadaghan nakong makaanha sa Marian Hills. Akong namatikdan nga kon Domingo magsugwak ang mga tawo. Sa kasagaran nga adlaw, matod nila, aduna say manganha apan di kaayo daghan.

Sa nakita nako sa mga imprastraktura, nakaingon ko nga nadevelop na ang bungtod sa medieval nga disenyo. Kon piyungon ko ang akong mga mata sa makadiyot motugpa dayon sa akong kaisipan ang mga heritage worship places sa Europe.

Gikan sa halayo gud mapagarbuhon sa iyang kaligdong ang simbahan sa Marian Hills. Sa bayhon niini daw milipang ang kahilom nga gikinahanglan sa pangaliya ug pagampo sa tawo.

Mabanabana nga minilyon ang salapi nga gigasto sa pagpalambo sa dapit. Ang tinubdan sa salapi, matod pa, gikan sa mga amot ug tampo sa mga devotees. Salapi sad gikan sa ubang kalihukan sama sa pamisa ug mga kandilang dagkutan inigpangamuyo.

Usa sa nakadani sa akong pananaw mao ang pagmata sa dapit nga dugayng nahikatug. Miguho ang mga negusyo sa mga maabtik nga tawo sama sa mga tindahan ug parking areas.

Dunay pagpahimus nga akong nakita sa kamahal sa presyo sa mga palaliton ug abang sa parking area. Matod sa akong higala morag dolyar na kuno ang presyo sa mga baligya labi na sa parking fee nga P40.00.

Ang mga parking area maoy mga ginagmayng luna nga kasikbit sa Marian Hills. Kanhi, matod pa, gipanamnan kinig mais ug ubang lagutmon apan karon dritso na nga namungag salapi.

May mga dagkong balay nga gipangtukod duol ug di kaayo layo sa Marian Hills Suma sa taga Lindugon, gitukod sa duha ka tuyo: pinuyanan ug abangan isip pension house sa mga langyaw nga manganha.

Sa laing bahin, nakatimbol pagayo ang Marian Hills sa ekonomiya sa barangay Simala diin kabahin ang sityo Lindugon. Matawag kini nga bunga sa pagtuo ug paghangop sa katawhan kang Mama Mary.

Gani, matod pa, minilyon ang kita matag buwan sa mga monghe nga maoy nagda sa Marian Hills. Kaadunahan nila, yawyaw sa akong higala, hinaot pa unta kuno nga namahin sila sa mga balay sa kaluoy dinhi sa ato.

Nasabtan ning lindog nga wa isud sa bulsa ang salapi nga gitubod sa Marian Hills tungod sa matahom nga kalambuan sa dapit. Kon dunay nanguwarta tulubagon niya kini sa kahitasan nga di magpanuko sa pagsilot sa tawong dautan nga nangilad.