Duha ka kalampusan sa media
SAMA sa naandan, nahimong malampuson ang pagbukas sa Press Freedom Week ug Broadkasters Month niining buwan sa Septiyember 2014 nga gitambungan sa mga nagkadaiyang media outlets sa Sugbo.
Kining duha ka mga dagkong kalihukan paghandom sa atong kagawasan human nahaw-as sa kangitngit sa dihang nahimugso ang Martial Law. Nawagtang ang among katungod sa pagsuwat ug pagsulti sa tinuod nga panghitabo niadtong panahuna.
Karon nga nahibalik ang kagawasan dunay mga butang nga maghatag og leksyon sa media hilabi na sa broadcast nga anaa sa pagpangomentaryo. Dili magpakauwaw pinaagi sa pag-unay ug ataki kay pulos sila mensahero. Mabuhi ang media sa Sugbo!
KONTROBERSIYA SA KAPITOLYO
Kon gimando ni Gobernador Jun Jun Davide ang pagbiya ni Loy Madrigal isip consultant sa Kapitolyo, human malambigit sa kontrobersiya sa giingong pakigrelasyon sa iyang sekretarya, angayang himuon sab kini ni Board Member Teddy Ouano sa iyang tawo.
Basi sa entry sa blotter sa Police Station 3, ubos sa Mandaue City Police Office niadtong Agusto 13, 2014, alas 4:20 sa hapon, gireklamo sa usa ka Rachael Cafino Pangan, hingkod ang panuigon, dalaga ug molupyo sa Doña Rosario Village, Mandaue City.
Ang gireklamo ug nahimong suspek ang magtiayong Rochelle Bustillo staff ni provincial member Teddy Ouano, ug ang banang si Emy Bustillo nga maoy media relations sa pamilyang Ouano sa pulitika.
Matud sa reklamo ni Pangan, mga alas 4:15 sa hapon miadto ang biktima sa police station ug miasoy nga sa dihang sa paggawas niya sa opisina ang mga suspect nasuko kaniya; ug nangutana kinsa man ka?
Og matud pa niya siya gipasanginlan nga maoy nagtsismis. Samtang si Emy nasuko ug miingon nga dili ka mag apilapil.” KUNG GUSTO MOG PATAY MAGPATAY TA DIRI”. Human sa hitabo dali siyang nagpa blotter sa kapulisan tungod sa kahadlok.
Para nako dili maayo ang gihimo sa magtiayong Bustillo. Makadaot kini sa amo nilang pulitiko. Wa may nabalita nga barombado ang mga Ouano. Apan dunay mga goons nga gidala ang magtiayong Bustillo, nga mga tawo ni Ouano.
KONSEHAL NGA ADIK?
Para nako, angayang tangtangon sa pagka konsehal sa barangay sa siyudad sa Talisay ug sa kompaniya nga iyang gitrabahoan kining tawhana. Makatakod kining iyang bisyo kay dili siya maayong ehemplo.
Di una nako hinganlan samtang nagpaabot ta sa resulta sa ipahigayon unya nga drug test sa tanang sakop sa konseho sa barangay nga di lang nako hinganlan. Mangatol kuno ang kamot kun dili makasuyop.
Lutaw kuno kaayo modagan ug molayat sa higayon magduwa og basketball. Puwa pag mata nga morag sigbin kay mosuyop diay daan sa dili pa moduwa. Pagka way hinungdan niining maong konsehal.