Bayani ba si Marcos?

SUBLING nanawagan ang pamilyang Marcos nga adto ilubong sa Libingan Ng Mga Bayani si kanhi Presidente Ferdinand Marcos.

Se Senador Bongbong Marcos nga daw carbon copy ug hitsura sa iyang amahan miingon nga aron dunay panaghiusa, angayan nga tugtan na nga malubong sa Libingan Ng Mga Bayani ang kanhi Presidente.

Matud ni Bongbong nga angayan nga hatagan ug bili ang pagdumala sa iyang amahan isip Presidente sulod sa 20 ka tuig nga maoy nakahimo og labing taas nga serbisyo isip pangulo sa nasud.

Gipadayag usab ni Bongbong nga bayanihon ang gihimo sa iyang amahan sa dihang nagsilbi kining sundawo ug apil sa nakiggiyera batok sa mga Hapon atol sa ikaduhang gubat sa kalibotan.

Si Marcos taud-taod nang anaa sa musuleyo sa Ilocos Norte diin wala pa nadugta ang iyang lawas tungod sa airconditioned glass ug espisyal nga kabognawon aron dili madunot ang Taudtaod na ang panawagan nga si Marcos adto ilubong sa Libingan Ng Mga Bayani sa Taguig ug natukod niadtong tuig 1947. Kini ang nagsilbing lubnganan sa mga Pilipino nga nakiggubat batok sa mga Hapon.

Kini usab ang lubnganan sa kanhi mga dagkong opisyal sa nasud sama nila ni kanhi Presidente Carlos Garcia, Diosdado Macapagal ug Jose Laurel.

Dili sakto nga basehan ni Bongbong nga tungod kay ang iyang amahan mao ang Presidente nga nakahatag ug pinakataas nga serbesyo sa nasud, adto na siya ilubong sa Libingan Ng Mga Bayani.

Ang 20 ka tuig nga pagdumala ni Marcos sa nasud mao ang kataas sa panahon diin iyang giabuso ang katawhan pinaagi sa pagpangyatak sa mga katungod nga naglakip sa pagtak-op sa kagawasan sa media sa pagpadayag.

Tinuod nga daghang mga proyekto si Marcos apan kini iyang gihimo nga may sagol daotang motibo sa iyang korapsyon. Siya ang milubong ug maayo sa nasud sa dakong utang.

Samtang kon ang pagkasundawo ni Marcos ang hisgotan, ang Amerika mismo nakasakop ug mga peke nga mga awards ug medalya sa kanhi Presidente. Si Marcos nangangkon nga nahatagan siya ug medalya ni Heneral Douglas MacArthur tungod sa iyang pagpangulo sa mga sundawo sa pagdepensa sa Bataan.

Apan nakasakop ang Amerika nga peke ang mao nga medalya ug gikatahapan nga si Marcos nakigkumbuya pa sa mga Hapon batok sa hiniusang tropa sa mga Pilipino ug sa mga Amerikano.

Sila si kanhi Senador Ninoy Aquino ug kanhi Presidente Corazon Aquino nga giila nga mga bayani, wala gani gilubong sa Libingan Ng Mga Bayani.

Unsa may gusto sa pamilyang Marcos ? Bisan pa ba diay si Marcos nga usa na ka patay makapadayon pa ug hamok ngadto sa katawhan?

Nganong ipamugos man gyod nila ug lubong si Marcos sa Libingan Ng Mga Bayani?

Nganong kutkuton pa man gyod pag-usab sa pamilyang Marcos ang uwat sa samad sa diktadorya?