Binuang sa trabaho

Dear Papa Joe,

Ako si Mr. Gemini. Ang akong suliran kabahin sa among trabahuan. Wala man koy problema sa akong amo, kon dili sa among kauban. Bag-o pa ko diri, maglima pa ka buwan, pero nakita nako ang mga bati nga binuhatan sa akong mga kauban sud sa among trabahu-an labi na og wala ang among amo.

Isip junior nga ahente, probationary pa gyud, di ko makasulti. Okay okay ra ta nako nga di manghilabot, pero danihon ko nila kay basin mopiyaet ko ug matod pa nila nga tabangan ko nila nga ma- regular kay ila kong irekomendar og maayo sa among boss basta moapil ko nila.

Kini sila naanad nga kuhaan ang mga butang baligya nga di sakto ug ang kinuha ibaligya. Nakabantay na ko ani nila pero wala ko manghilabot kay sugod pa lang ko. Pero sa akong pagbalibad kay silang tanan bati na og tinagdan nako. Nahadlok ko nga di ko madawat diri ug wa sad koy mahimo kay kon motug-an ko, tuohan sab kaha ko nga bag-o pa lang ko diri? Galibug ko kay nakauyon na baya ko diri ug maayo man sad ang sweldo. Palihug tambagi ko.

MR. GEMINI Mr. Gemini,

Naa gyuy mga tawo nga ingon an, Bro, nga gihungitan na, kan on pa ang kamot sa naghungit. Ang maalaot sa ilang binuhatan dili lang ang inyong amo, hasta na ang mga customer ninyo kay di man diay na sakto ang inyong gibaligya.

Kon magpabilin ka diha kay dako ang sweldo maayo, pero klaro nga kon limpyo ka, hugaw ka nila. Klaro nga makontra nimo sila kay threat naka nila ug basin unsa pay buhaton nila nimo. Pero kon lig-on ka sa imong baruganan, pwede ikaw pa ang makapausab ana nilang tanan kon regular na ka. Pero kinahanglang naay ebidensya ug prinsipyo. Kon sakyan nimo sila para makisama, aw samot ang cancer sa atong nasud ana. Busa huna-hunaa kay sa tumoy ning tanan ikaw ra ang makatubag. Daghang salamat.

PAPA JOE