I did my best

GUSTO na gyud kong masuko kang JP. Sa akong paminaw sa akong kaugalingon, misaka ang akong dugo sa akong utok, morag gusto nang mosilaob ang akong kalagot. Pero parehas sa naandan na, nagpasensya ko sa kinaiya sa akong

boyfriend.

Bisag iya kong giaway ron, sa way lugar niyang pagselos kang Noel, naningkamot gihapon ko nga magpabiling magmabugnawon.

“Tinuod bitaw nang imong giingon, JP. Nangaon mi si Noel sa Jollibee ganinang udto. Pero kutob ra diha, uy.”

“Pero nganong wa ka man mosulti ani nako? Nakita ko kamong duha ganinang udto. Malipayon kaayo mong nangaon!”

Isog gihapon ang tingog nini JP. Nagpasalamat ko nga nanulod na si Mama ug Papa sa ilang kuwarto. Wa sila makadungog sa dakong tingog ni JP. Sa second floor ang kuwarto sa akong parents.

Two storie ang among balay. Diha mi sa sala mag-estorya si JP. “Sultihan tika ani, uy. Karon ang akong plano nga tug-anan tika kay nasayod man ko nga mamisita ka nako. Pero giunhan man ko nimo sa imong kasuko. Wa ko nimo tagaig higayon nga makasultig una. Gisukmatan dayon ko nimo sa imong pag-abot ron.” Mikarat ang akong tutunlan. Kahilakon ko.

Namatngonan ko ang pagpanghupaw ni JP. Medyo nakasabot na siya nako, labi na nga nakita ko niya nga hapit na gyud mohilak. Pero suko gihapon ang iyang nawong. “Wa ko magluib nimo, JP.” Mitindog si JP. Medyo nawala na ang iyang kasuko nako. “Mopauli lang sa ko, Ellen. Mituo ko nimo. Sorry. Nakalitan lang

ko.”

Morag nauwaw si JP sa iyang pag-away ug pagpasangil nako nga nagtraydor ko niya. Igo na lang kong miyango. Gihatod ko siya

kutob sa gate sa among lagwerta. Unya, misulod ko sa akong kuwarto human ko trangkahi ang pultahan sa gate ug pultahan sa among sala. Misulod na ang among katabang sa iyang kuwarto.

Sa sulod sa akong kuwarto, nakabakho na gyud ko tungod sa kahiubos ko kang JP.

Domingo nianang pagka ugma, diha ra ko sa among balay pagkahuman kog panimba nianang pagka buntag. Nagpahayahay ko sa among lawn ubos sa landong sa Persian Mango. Si JP ang akong gihunahuna. Hangtod asa kutob ang pagpasensya ko niya? Sa akong paminaw, natuok na ko pag-ayo sa iyang pagka seluso.

Unya nakatan-aw ko sa gate sa among lagwerta. Nahiabot si Noel. Nagwara-wara siya sa iyang kamot nako. Giduol ko siya ug gipasulod. Nahibulong siyang nagtan-aw nako.