Imports mag-unay
MAG-UNAY ang duha ka kanhi mga import sa University of the Visayas (UV) Green Lancers nga sila si Mike Harry Nzeusseu ug Steve Cedric Akomo karong gabii.
Ang duha, nga mao ang nagpakampiyon sa Green Lancers sa Cebu Schools Athletic Foundation Inc. (Cesafi) sa miaging tuig, nagbuwag na karon og dalan sa commercial level.
Si Nzeussue gikuha sa Davao City- based Goldtar Hardware samtang si Akomo naa sa Samsam Gullas-Panalay Tailoring.
Karong gabii, magsangka ang Goldstar ug Samsam Gullas-Panalay Tailoring sa usa ka exhibition game sa Baybay City, Leyte.
Usa man tuod kini ka exhibition game apan labing seguro maghinabwaay sa tanan nilang katakos ang duha ka mga kampo kay nagsilbe kining lamas sa gikaintapang Cebu-Leyte Cup basketball tournament diin pareho silang apil.
Sa Cebu-Leyte Cup, ikaparang sa Goldtar ug Samsam Gullas-Panalay Tailoring ang tulo ka teams sa Philippine Basketball Association (PBA) nga mao ang Brgy. Ginebra San Miguel, Meralco Bolts ug Barako Bull.
Ang Cebu-Leyte Cup opisyal nga sugdan ugma sa lungsod sa Hinundayan, Southern Leyte diin magparang ang Goldstar batok Ginebra sa alas 6:00 sa gabii dayon mosunod ang duwa sa Barako batok Samsam Gullas-Panalay Tailoring.
Ang aksyon sa torneyo motapon sa lungsod sa Minglanilla, Cebu karong Septiyembre 27 unya matiwas kini sa Mandaue City karong Septiyembre 28.
Alang sa dugang mga impormasyon sa torneyo, mahimong motawag sa 0932-6448871.
Sa laing bahin, mangabot sa Baybay City karong adlawa ang mga sakop sa Ginebra ug Barako aron manghatag og relief goods alang sa mga nabiktima sa bagyong Yolanda.
Kining maong tanang kalihukan nahimong posible tungod sa suporta nila ni Cong. Jose Carlos Cari, Mayor Carmen Cari, ug Vice Mayor Michael Cari.