China mogamit og mga higante

NANGHINAOT ang China nga ang bag-o nilang bersyon sa ilang bantugang “Great Wall of China” makatabang aron magpabilin ang ilang dominasyon sa basketball sa Asian Games hilabi na karon nga nakasugat na sila og grabeng pagpanghudlat sa ilang mga karibal.

Gamit ang higante nilang mga magduduwa pinangulohan ni kanhi National Basketball Association ( NBA) superstar Yao Ming, ang China maoy naghari sa basketball sa Asya sulod sa pito ka mga higayon sa milabayng siyam ka mga edisyon gikan niadtong 1978.

Apan human nila napatigbabawan ang 2010 Asiad sa ilang balwarte sa Guangzhou, miretiro na si Yao unya nawala na sab ang ubang kanhi NBA players nga sila si Wang Zhizhi ug Yi Jianlian.

Karong tuiga, ang China gilaumang makasugat og grabeng pagpanghudlat sa South Korea, China, ug Philippines, sa ilang kampanya sa pagdepensa sa ilang korona sa Asian Games sa Incheon, South Korea.

Ning higayuna, iparada sa China ang duha sa labing tag-as nga mga magduduwa sa Asya nga sila si Zhou Qi ug Wang Zhelin.

Si Zhou usa ka 18 anyos nga adunay gitas-ong 7’1½ ” samtang si Zhelin adunay gitas-ong 7’ ¼.”

Lima ra ka mga magduduwa sa China ang nagpabilin sa ilang 12-man line-up nga nakatilaw og kapakyasan sa 2013 FIBA Asia Championship.

Ang Iran, nga maoy naghari sa FIBA Asia Championship, mipadayag sa dako nilang pagsalig nga mailog nila ang titulo gikan sa China.

“We are going to win the Asian Games for the first time. Without a doubt, the Iranian basketball team will participate in the Asian Games to win the gold medal,” matod sa forward sa Iran nga si Barahmi.

Si Bahrami kauban ang higanteng si 7’2” Hamed Haddadi mao ang mangulo sa Iran.