HINAYHINAY NGA PAGBANGON

Mao kini ang hulagway sa Basilica Minore del Santo Niño nga gipatik sa front page ning mantalaan sa isyu niadtong Oktubre 16, 2014, usa ka adlaw human sa 7.2 nga linog nga mitay-og sa Sugbo ug Bohol. Tangkod nang usa ka tuig sukad sa pag-igo sa linog nga nikalas og 200 kapin ka kinabuhi. Makita gihapon ang mga timailhan sa makalilisang nga katalagman sa mga dapit nga nagrabehan sama sa Bohol, diin 200 pa lang ka classrooms ang hingpit nga naayo ug 700 kapin pa ang padayong gitrabaho. Hinuon, bisan duna pay mga tipaka nga nagpabilin gikan sa kadaut nga dala niini, makita ang hinayhinay nga pagbangon sa mga Bol-anon ug Sugboanon.

MAGUSA ka tuig na karong adlawa human nitayog ang 7.2 magnitude nga linog, apan sila si Kate Sarabia ug Monna Halasa, mga tinunan sa grade 4 sa Sto. Niño De La Paz Elementary School sa barangay Tontonan, lungsod sa Loon, probinsya sa Bohol, mangalisang gihapon sa higayon adunay mga aftershock.

Ang pagtukod og bagong mga classroom ug pagpaayo sa nangaguba nga mga lawak saringan ang nakasugat og kalangay.

Si Victor Yntig, physical facilities coordinator ug focal person on disaster and risk reduction management sa Department of Education (DepEd) 7, nipasabot ang pagsubay sa procurement procedures sa gobiyerno ang usa sa mga hinungdan nga aduna pay dakong kakuwangan sa katukoran sa bagong mga lawak saringan ug pagpaayo sa nangaguba.

Ikaduha, magpaabot usab ang DepEd sa Geohazard Assessment Report sa Mines and Geosciences Bureau sa Department of Environment and Natural Resources sa dili pa magtukod og bagong mga classroom ug magrepair.

Apil sa GAR ang findings ug mga rekomendasyon sa MGB pagseguro nga luwas ang gipangtukod nga mga lawak saringan gikan sa mga sinkhole.

“As much as possible, atong gipaningkamotan nga ang mga classrooms gi- built wala gitukod ibabaw sa mga sinkholes.We have to follow sa government procurement,” pagpasabot ni Yntig sa Sun. Star Superbalita.

Ang 7.2 magnitude nga linog nga nitayog sa Bohol, Sugbo ug ubang bahin sa Visayas ug Mindanao niadtong Oktubre 15, 2013, ang nikutlo og 200 ka mga kinabuhi ug niguba og binilyon ka pesos nga infrastructures apil na ang karaang mga simbahan.

Si Yntig nipahibawo nga niabot og 1,260 ka classrooms ang hingpit nga nangagusbat sa Bohol tungod sa kusog nga linog niadtong Oktubre sa niaging tuig.

Apan hangtod kagahapon, 270 pa lamang ang nahuman og tukod samtang, 731 ang padayon karon nga gitukod ug gipaabot mahuman karong Disyembre ning tuiga, dugang niya.

Kini nagpasabot nga aduna pay 259 ka mga classroom ang kinahanglan nga ipatukod sa DepEd.

Samtang, niabot og 1,145 ang mga classroom nga nakaangkon og kadaut ug nanginahanglan og repair.

Si Yntig nibutyag nga 440 pa lamang ka mga classroom ang narepair ug aduna pay 705 ang ayuhonon.