PULIS GILAMBIGIT SA TULIS

Sakop sa CCPO nga nag-Awol; bata-bata giilang maoy miigo sa Western Union

PULIS nga nagabsent with official leave (Awol) ug nagatubang og mga kasong pagpanulis gidakop niadtong Lunes sa alas 2:30 sa hapon kay gilambigit sa pagpanulis sa Western Union money transfer sa Brgy. Guadalupe, dakbayan sa Sugbo.

Si PO2 Ronilo Manuel, 32, sakop kaniadto sa Cebu City Public Safety Company (CCPSC) sa Cebu City Police Office (CCPO), apan nagAwol ug gipailawom sa summary dismissal proceedings nadakpan sa kapulisan sa Brgy. Labangon, dakbayan sa Sugbo.

Nakasikop kaniya mao ang joint operatives nila ni Supt. Romeo Santander, hepe sa City Intelligence Branch (CIB) ug CCPSC pinasikad sa warrant of arrest nga giisyu ni Judge Alexander Acosta, sa Regional Trial Court (RTC7) Branch 9, tungod sa kasong pagpanulis.

Sa mao nga pagpanulis, positibo siyang giila sa biktima nga si Rachel Cuico kinsa nakuhaan og P12,000 niadtong Pebrero 12, 2014 mga alas 3:35 sa kaadlawon sa may RR. Landon st., dakbayan sa Sugbo.

Sa hot pursuit operation, si Manuel ug kauban nga si Benito Andres Cataluna Abear nasikop sa mga sakop sa Police Station 2 ug napasakaan ang mao nga pulis og kasong administratiba ug grave misconduct niadtong Pebrero 20 ning tuiga.

Si Santander niingon wa nila isalikway ang posibilidad nga si Manuel dunay koneksyon o maoy lokal nga contact sa mga tulisan gikan sa Mindanao.

Kini kay nalink siya sa daghang pagpanulis sa dakbayan sa Sugbo ug ang labing uwahi mao ang Western Union sa Barangay Guadalupe sa miaging simana.

Kauban niya si kanhi PO2 Eugene Salingay gikan sa Oroquieta City, Misamis Occidental.

Basi sa nakuhang security footage sa CCTV, si Salingay, maoy unang nisulod sa remittance, nga nagkawo niadtong higayuna samtang ang nisunod nga naghelmet ang batabata ni Manuel nga si “Paopao.”

Si Santander nagkanayon nga dako kaayo og porsento nga may kalambigitan si Manuel sa pagpanulis sa Western Union, apan sa pagkakaron nagpadayon ang ilang pagpanguhag impormasyon.

Gipaabot sab sa kapulisan ang laing tulo unya ka mga warrant of arrest batok kang Manuel sa kasong robbery nga gikalambigitan niini.

Samtang mikatap sa Youtube ang video ni Manuel nga nagsuyop sulod sa usa ka uptown motel nga gikuhaag footage sa iyang uyab.

Si Santander nagkanayon nga samtang nangita silag hulagway ni PO2 Manuel, nakita nila ang video niini nga naghukas nga nagsuyop.