Agelio "Titing" Ceniza Sr. sa Super Ka!
Hilum nga nagmatuto sa Musikang Binisaya
Tingali sa bag-ong henerasyon, dili pamilyar ang iyang pangalan. Apan sa mga mahiligon og mga kantang Binisaya o nagdako sa mga harana ug balitaw, siguradong nakaila ni Titing Ceniza ug sa iyang mga natampo sa atong kultura ug musika. Sa edad nga 61, padayon ang iyang pag-ugmad sa mga lunlong Bisaya isip musical director ug kompositor sa “Handurawan”, ang bugtong musical show sa Sugbo nga nagbanhaw sa mga karaang huni ug awit nga makita sa CCTN (Cebu Catholic Television Network). Si Titing usab ang ni-composed sa halos tanang teleserye/
telemovie themes sa CCTN, sama sa My Last Refrain, Mga Mata Ni Agila, Nasulat sa Dugo ug Bugti. Siya usab
ang nitagik sa CCTN Christmas jingles Lunsay’ng Diwa sa Pasko, Don’t Look For Sta. Claus,
Kahayag ug ang Hello Cebu theme song.
Agelio “Titing” Ceniza, Sr., Super Ka!
Kinsay nagkonsepto sa Handurawan?
Ang mismong tag-iya sa CCTN nga si Nonito "Tatay Dodong" Limchua. Siya gyud ang nakahunahuna ug nagmugna sa Handurawan niadtong 2006. Tinuod nga talagsaon kay nag-inusara ra ang maong show sa telebisyon. Kaming duha ni anhing Ester Alferez ang gisangunan ni Tatay Dodong nga himuon ang iyang giplano. Si Ester maoy orihinal nga singer ug host uban ni Lita Lauron.
Unsay imong responsibilidad isip musical director?
Akong trabaho mao ang pagpangita og mga kanta nga wala pa sukad ma-feature sa maong show. Akong hatagan ang duha ka gitarista og record aron ilang ma-sepra ang mga kanta. Anaa usab ang akong presensiya atol sa rehearsal duha ka oras sa dili pa magsugod ang live show. Akong hanayon ang mga kanta niana nga episode aron maoy tamdan sa tanang entrante. Sa samang higayon, ako usab ang stage director.
Full-time gyud ka sa CCTN?
Talent ang akong status apan nagdawat kog binuwan nga sweldo. Nagtrabaho ko sa una sa San Miguel Corp. Mandaue Plant sud sa 11 ka tuig isip quality control inspector. Ni-avail ko sa optional retirement niadtong 1989. Sukad ato, full-time nako as musician.
Kinsay naka-influence nimo nga magkompositor?
Ang akong apohan nga si Raymundo "Mundong" Castaneda. Siya ang composer sa Handurawan nga maoy gihimo nga theme song ug ulohan sa programa. Lolo Mundong ang among tahod niya ug siya ang amahan sa akong inahan nga si Daniela Castaneda Ceniza. Nagsugod kog himo og kanta, 13 anyos pa lang ko.
Unsay maisip nimong signature hit/s?
Ang akong winning entry sa Cebu Pop Music Festival nga “Paghigmata” nga gi-interpret ni Edgar Seno ug gihimo nga theme song karon sa programa ni Tatay Dodong sa Channel 47 nga dunay susamang ulohan ug gikanta ning higayona ni Dianne Cindy Lim. Nahimo kong grand finalist sa Cebu Pop sud na sa upat ka higayon.
Sa kadaghan sa imong komposisyon unsay dili nimo malimtan?
Ang theme song sa Buhing Kalbaryo sa Cebu City government pinangulohan ni Mayor Michael Rama. Dili mawala sa akong hunahuna tungod kay dayag nga daghan ang natandog sa dihang giawit kini ni Necie Diaz dungan sa pagkamatay ni Hesukristo nga gilansang sa krus. Duna gyuy mga wa makapugong ug nanghilak. Dili sad ko kalimot sa mga nahimo nakong theme song sa Kabanhawan Festival sa Minglanilla ug sa Inasal Festival sa Talisay City tungod sa pasidungog nga akong nadawat.
Di ba nakahimo sad kag mga orihinal nga kanta sa musical play sama atong “Taym Pa?
O, ang Taym Pa. Usa lang na sa daghang Cebuano musical stageplay nga akong nahimoan og original nga mga kanta niadtong dekada 80, lakip na sa mga musical stageplay ni anhing direktor Raji Palanca. Diha say higayon nga gikuha ko sa Kabataang BarangayCebu City Chapter para sa ilang entry sa stageplay competition nga niabot pa sa Cultural Center of the Philippines. Gani, sila (ang KB Cebu City) ang nidaug sa Best Musical Play category.
Duna kay mga album sa imong komposisyon?
Dili gyud tanan pero naa koy nahimong album niadtong 1991, ang God's Lamb (The Promised Seed) ubos sa produksyon sa Praise Inc. ni Johnny Sy sa Manila. Sa tungatungang bahin 1990's nagkaila mi ni Baste Balboa ug duna mi gihimo nga recording projects. Siya pa ang production manager sa Platinum Records didto sa Manila. Hangtud nga sa tuig 2003 among gisugdan ang pinakauna nga musical program sa CCTN ang “Salamat sa Musika.” Apil usab adto si Joey Magalso.
Kaatbang sa Handurawan ang mga primetime teleserye. Wala mo mahingawa nga basig wa unyay manan-aw ninyo?
Wa gyud kay confident kaayo mi nga daghan ang ganahan sa mga kantang Binisaya. Usa ni sa hinungdan kon ngano nga nagmalampuson ang Handurawan. Laing hinungdan tungod kay mga maayo ang atong mga host ug performers. Si Amie Filomeno lang usa siya ka experienced recording artist. Anaa usab nato ang makalingaw nga si Jun Villarta sa iyang mga novelty songs. Dili kumpleto ang show kon wala si Jun kay pangitaon gyud siya sa katawhan. Samtang si Lauro Flores usa ka award-winning singer ug composer sa Cebu Pop. Drama talent sab si Lauro sa CCTN. Si Marion "Matet" Cabudlan ang representante niadto sa Sugbo sa GMA 7's Pinoy Pop Superstar. Samtang ang duha namo ka mga gitarista nga sila si Romwel Noval ug Niel "Dodong" Ngujo mga karaan ug banggiitang haranista sa DYKC ug DYRF.
Unsaon ninyo pag-ila kon daghan ba o gamay ang nananaw ninyo?
Dili gyud ta ka-determine sa audience share pero base sa text messages nga atong makita sa computer printout, liboan gyud. Wa pay labot sa igo lang nanan-aw. Kay gawas sa among Live show kada Sabado (9 p.m.), duna tay replay matag-Dominggo (5:30 a.m.). Usahay i-replay sad ni sa ubang mga adlaw.
Unsay makonsiderar nimong biggest achievement?
Ang akong kasamtangan nga posisyon sa CCTN. Nagpasalamat kog daku ngadto ni Tatay Dodong Limchua ug Nanay Diana Limchua uban sa ilang tibuok pamilya sa ilang pagsalig ug pag-ila sa akong God-given talent.
Unsay damgo nimo alang sa mga huning Binisaya?
Unta nga modaghan pa ang magmahal sa atong mga huni ug awit. Pagkangan nga gihimo kini sa atong pinulongan.
Aduna ka pa bay gustong makab-ot sa imong career?
Wa na tingali gawas lang sa mga panghinaut nga unta makahimo pa ko’g makahulogananon nga mga awit aron mapaambit znato sa atong henerasyon.