CLB andam motabang kon dunay re-investigation sa Ella Joy case

KON maablihan man gani og balik ang imbestigasyon sa kamatayon sa bata nga si Ellah Joy Pique, ang Children’s Legal Bureau (CLB) hugot na nga makigalayon sa kapulisan ug ila gyung sundan ang matag lakang nga himuon niini may labot sa imbestigasyon.

Kini aron dili na masubli pa ang insidente nga sayop nga tawo ang makuhang responsable ug mapasakaan og kaso.

Ang CLB nga maoy nagsilbing private lawyer sa pamilyang Pique, diha na mihupot sa kaso dihang napasaka kini sa korte ug nasugdan ang husay sa kasong kidnapping with homicide batok sa mga natumbok nga suspetsado.

Matod sa tigpamaba sa CLB, Atty. Noemi Abarrientos, igo nalang sila nga nisalig sa mga ebidensiya ug mga dokumento nga nahanay sa kapulisan subay sa gihimo nila nga imbestigasyon.

Dugang ni Abarrientos nga posibling dili mabasura ang kaso kung diha palang sa imbestigasyon nakasulod ang ilang grupo alang sa pagtanaw sa pakisusi sa kapulisan labot sa insidente pagdagit ug pagpatay kang Ellah Joy Pique niadtong 2011.

Ang korte una nang mibasura sa kaso batok sa gidudahang responsable sa krimen nga si Bell Ruby Santos tungod sa kakuwang sa ebidensiya sa prosekusyon.

Nunot sa nahimong desisyon sa korte, nanghinaot sa CLB nga mao kini ang kamatuoran, bisan paman og duna silay kwestiyon sa hukom.

Kung mopabor hinuon gihapon ang pamilyang Pique sa re-investigation sa kaso, gipaniguro ni Abarrientos nga motabang gihapon ang CLB sa bisan unsang paagi, ilabi na sa himuong pakisusi sa mga otoridad.

Sa laing bahin, nagplano pagbalhin sa ilang pagpuyo ang pamilyang Pique gikan sa ilang panimalay sa brgy. Calajoan, lungsod sa Minglanilla. Kini human nga ang maong dapit padayon makapahinumdum kanila sa pait nga gidangatan sa bata nga si Ellah Joy.

Gitugan ni Abarrientos, nga mao kini ang nahimong desisyon sa amahan sa biktima nga si Renante human nga hangtud karon, wa pa gyud sila makakabot og hustisya alang sa batang biktima.

Matod ni Atty. Abarrientos, duna’y kaugalingon nga mga plano ang pamilya nga buot nilang tumanon aron malikayan nga mapunan ang sakit nga ilang gibati nunot sa pagkawala sa ilang anak ug sa padayong pagkagawasnon sa mga responsable.

Sa miaging semana, gibasura sa korte ang kasong kidnapping with homicide batok sa akusado nga si Bella Ruby Santos nga maoy nakapahuyang sa tibuok pamilyang Pique ug maoy hinungdan nga gusto nang mopalayo sa pamilya sa mata sa publiko tungod sa gidangatan sa kaso.