Kaso batok Rama, 13 ka mga opisyal gisugdan og husay

GIATUBANG og gihusay sa Department of Interior and Local Government (DILG7) ang reklamo nga grave abuse of authority ug grave misconduct batok ni Mayor Michael Rama ug 13 ka mga opisyal kagahapon didto sa buhatan sa DILG7.

Atol sa hearing nga gidumala ni Atty. Chris Tiu sa DILG, gikwestyon ni City Legal Officer Jerone Castillo ang hurisdiksyon sa Malacañang bahin sa maong kaso diin sila niduso og motion to dismiss ngadto sa buhatan ni Presidente Benigno Aquino III gumikan sa kakuwang sa basehan.

Ang abogado ni Reymelio Delute nga si Benjamin Militar niinsister nga ipadayon ang husay ug resolbahon ang maong mga kaso nga ilang gisangat apan wala maminaw si Tiu inay nimando sa kampo sa reklamante nga tubagon pinaagi sa position paper ang omnibus motion sa kampo ni Rama sulod sa lima ka adlaw.

Gumikan sa maong hukom sa hearing officer, dili na madayon ang gikatakda nga marathon hearing sa maong sumbong nga molanat unta hangtod sa adlaw nga Huwebes.

Ang maong hearing gitambungan mismo ni Rama, Bise Mayor Edgardo Labella ug ang mga konsehal nga giapil pagpasaka og kaso sa kampo ni Delute bisan paman kon sakop sa Bando Osmeña Pundok Kauswagan.

Si Rama sa iyang bahin nagpasalamat ngadto kang Castillo ug Labella kinsa maoy nangabogar habig sa mga respondents ug maoy nagdala sa tingog sa kapin 4,000 ka mga kawani sa City Hall kinsa nakadawat sa tag P20,000 niadtong Disyembre 2013 human gitayog sa linog ug gikusokuso sa bagyong Yolanda ang dakbayan.

Si Rama positibo nga madismiss ang maong kaso sanglit para kanila, legal ang ilang paghatag og calamity assistance diin ang Cebu City gipaubos sa state of calamity niadtong higayona.