Ang gikahinaman nga From Junquera with Love
KANUNAYNG naghinam ang mga magbabasa sa unsay sumpay sa matag gula sa gikahinaman nga “From Junquera with Love” nga ang lilas nahimong komiks sa Sun.Star
Superbalita.
Apan, nahimong kontrobersiyal kini dihang ang samang titulo gihimo nang usa ka nobela.
Si Ike Racho nga maoy nagdibuho ug nagtagik sa mga linya sa matag episode sa “From Junquera with Love” mapasigarbuhon nga nahimong tipik ang iyang lilas ning mantalaan nga gihulagway niyang “mao toy
masterpiece nako”. Iyang gitumbok nga mosobra sa pito ka tuig nga napatik sa mantalaan ang iyang masterpiece nga nagsugod kini sa black and white unya nahimong color diin kaabag niya kaniadto ang iyang kamaguwangan nga anak si Helmut nga maoy motiwas sa pag- color niini. Nag-edad nag 21 anyos karon iyang anak ug uno pay edad niini dihang nagsugod siya sa paghimo sa “From Junquera with Love.”
Gibase niya sa komiks nga Sin City ni Frank Miller ang iyang konsepto sa paghimo niini. Kay ganahan man siya sa Sin City busa naghuna-huna usab siya kon unsay maayong Cebuano version niini ug nisantop sa iyang huna-huna ang From Junquera with Love.
“Nagdako ko sa comics mao enjoy kaayo ko sa pagbuhat ato,” saysay ni Racho diin gawas sa From Junquera with Love iyang obra usab ang “Dugo, Uwat ug Luha,” “Pantasya ng Bayan” ug “Pepe and Tom” pulos napatik sa
Sun.Star Superbalita.
Lipay kaayo siya nga daghan ang nagsubay sa iyang lilas matag adlaw diin niabot og 10 ka mga episode ang iyang nabuhat.
“Kusoga sa Super (Superbalita) ato uy! Mopalit man sad kog Super wa nakoy mapalit,” butyag niya. Iyang gitipigan ang mga napatik na ning mantalaan ug gi- scan ang uban aron aduna siyay soft copies niini apan nangadaot na ang uban kay nabasa sa uwan ug bagyo.
Matod niya nga inig abot niya sa trabaho anang gabii mohatag siyag tulo ka oras diin makahimo na siyag alang sa duha ka isyu apan dihang color na moabot nag lima ka oras iyang pagtrabaho unya ang iyang anak na maoy motiwas sa pag- color niini.
Niangkon siya nga gituyo niyang gawas sa sexy kaayo ang iyang drawing sa mga karakter sa comic mao usab ang matag linya sa gisulti niini.
Gani, ang iyang amahan kaniadto kanunayng pangutan-on sa iyang mga kauban sa trabahoan kon unsay sumpay sa sunod adlaw nga mga moguwa.
Si Racho nipahibawo nga adunay nagkadaiyang klase sa mga tawo nga nagsunod sa iyang komiks ang nituyo sa pag-adto sa ilang balay aron makighimamat kaniya ug mangutana usab kon unsa nay sunod nga sumpay sa mga nanggawas na niyang lilas.
Apan, dihay higayon nga gipahimangnoan siya sa staff sa Sun.Star Superbalita nga di palabian og pa-sexy ang iyang mga drawing kay may nireklamo nga nagsilbi sa simbahan.
Ang gihimo niyang episode sa “Ang Mananapaw”, ang estorya niini kabahin ang pari nga natintal sa mga anaa sa Junquera.
Kon pwerting sikata sa From Junquera with Love nga komiks ni Racho, mao usab ang naangkon niini dihang nobela na ang gibuhat diin gitagik Fred Fuentes Monternel.
Sama sa gihapon, anaa gihapon sa naasoyng nobela ang paghisgot sa mga lingaw apan makagana nga paghisgot kabahin sa mga kalihokan sa gisaw-an nga relasyon.
Sa kadaghan nagsunod niini, daghan usab ang mga nagbantay niini sama sa mga awtoridad lakip na ang Cebu Anti-Indecency Board (CAIB).
Dihay higayon nga ang CAIB nisang-at og reklamo sa piskaliya sa dakbayan sa Sugbo nga nagtumbok nga ning mantalaan pinaagi sa gitagik nga From Junquera with Love nagpatik og mga “sexually suggestive” nga pulong ug nga gilapas niini ang balaod kabahin “obscenity”.
Apan, nipakanaog og desisyon ang piskaliya nga nagtumbok nga di law-ay kini.
Bisan niining kontrobersiya, padayon ang Sun.Star Superbalita sa pagpangita og mga makalingaw nga lilas nga sama sa komiks ug nobela nga From Junquera with Love makahatag gihapon og katagbawan sa tanang magbabasa.