Shabu nasakmit sa Dumaguete, Tanjay
DUMAGUETE CITY - Mokabat sa P334,000 ang kinatibuk-ang shabu nga nasakmit sa duha ka dakabayan sa lalawigan sa Negros Oriental.
Sa dakabayan sa Dumaguete, ang giingong distributor og gidiling drugas nasikop sa mga sakop sa City Anti-Illegal Drugs Special Operations Task Group pinangulohan ni Insp. Marvin Fegarido.
Ang nasikop giila nga si Arnaldo “Toto” Catubay, 27, ug molupyo sa Housing Project, Barangay Cadawinonan ning dakbayan.
Sumala sa kapulisan nga nasikop ang biktima pinaagi sa search warrant nga giisyu ni Dumaguete City Regional Trial Court (RTC) Judge Gerardo Paquio Jr.
Ang suspek nakuhaan kinig 25 ngadto sa 30 gramos nga gituhoang shabu sa balay niini.
Ang lima ka bulto nga shabu sumala sa Dangerous Drugs Board mokantidad kinig P275,000, laing nakuha ang timbangan, tulo ka cellphone diin ang mga transaction ang nabasahan, basiyo sa mga plastic sachet, gunting ug sudlanan sa eyeglass diin ang ubang shabu gipamutang sa kuwarto nga gipanag-iya sa iyang iyaan.
Hugtanong gipanghimakak sa suspek ang shabu ug mga gamit nga nakuha sa kapulisan atubangan ni Barangay Kagawad Jimmy Tabada.
Subay sa naasoyng pagpangronda laing nakuha sa lawak sa suspek ang nagkadaiyang mga prenda nga gamit sama sa sapatos nga alang sa basketball ug ubang mga kahimanan ug nagduda ang kapulisan nga mao kini ibayad bugti sa drugasa.
Human sa malampusong operasyon sa kapulisan sa Dumaguete laing suspek usab ang nasikop sa mga sakop Provincial Anti-Illegal Drugs Operation Task Group pinangulohan ni Insp. Ran Jay Orapa didto sa Barangay Manipis, dakbayan sa Tanjay.
Ang mga nangasikop giila nga sila si Lou Jane Zerna alyas “Takya” molupyo sa Barangay 6, Tanjay ug Michael Vicente Martin Yulo, 46, ug molupyo sa Poblacion 2 sa samang dakbayan.
Nakuha gikan sa duha ang dakong bulto usab sa shabu nga mokantidad kinig P59,000 ug marked money nga maoy gigamit sa kapulisan.
Ang operasyon sa kapulisan napahigayon human mismo sa gipahigayong Anti-Drug Prevention and Control Summit sa dakbayan sa Dumaguete pinasubay sa Drugs Enforcement Agency ug Dangerous Drugs Board.