Lalake gipusil patay sa mga nagmotorsiklo

DUMAGUETE CITY - Patay ang usa ka lalake kagahapon sa kaadlawon human kini gipusil sa wa mailhing mga suspek nga giingong nagsakay og motorsiklo sa may Mango Ave., Barangay Piapi ning dakabayan.

Ang gipusil patay giila nga si Manny Fortin, 36, ulitawo ug molupyo sa nahisgutang lugar.

Ang biktima nakaangkon kinig ubay-ubay nga mga samad pinusilan hinungdan nga nakabsan sa iyang kinabuhi.

Nakuhang ebidensiya gikan sa nahitaboan mao ang usa ka basiyo sa kalibre .45, usa ka deformed slug sa armas ug laing basiyo sa 9mm nga kalibre sa armas.

Ang mga suspek diin upat ka wa mailhing mga lalake nagsakay kinig duha ka Honda Wave nga motorsiklo diin ang usa nakuhaan kini sa plate number.

Sumala sa kapulisan nga sa may alas 2:00 sa kaadlawon nakadawat silag tawag gikan sa nagpakabanang residente nga dunay gipusil patay sa lugar.

Ang mga sakop sa kapulisan daling niadto sa lugar sa nahitaboan pinaagi ni SPO4 Julius Orcollo nga maoy police on duty ug mga kaubanan.

Sa inisyal nga imbestigasyon napamatud-an nga ang biktima ug iyang higala diin bag-o lang naabot sa lugar ug miadto sa balay sa iyang ig-agaw ug nangaon.

Sa kalit lang ang mga suspek nibutho dayong pusil sa makadaghang higayon ngadto sa biktima.

Dugang pa nga ang biktima ug higala gikan kini nagabilar og patay sa silingang barangay nipauli kuyog ang higala.

Ang biktima gisuwayan sa pagdala sa Negros Oriental Provincial Hospital (NOPH) apan nakabsan gihapon kini sa iyang kinabuhi.

Ang kapulisan padayon karon sa ilang imbestigasyon kon unsay motibo sa pagpamusil ingon sa pagkasikop sa mga suspek.