Patayng lawas sa lalake nakit-an sa baybayon

ORMOC CITY - Usa ka patayng lawas sa wa pa mailhing lalaki ang napalgan sa baybayon sa Barangay Kilim, dakbayan sa Baybay, Leyte niadtong milabayng semana.

Ang biktima gihulagway nga anaa sa 25 ngadto sa 30 ang panuigon, anaa sa 5’2 ang gitas-on, nagsul-ob og short nga itom ug dunay tattoo nga “Alex Dela Cerna” sa tuo niining bukton.

Sumala ni PO2 Christopher Baslan nga usa ka tawag ang ilang nadawat maylabot sa hitabo ug naabtan sa kapulisan didto sa baybayon ang patayng lawas nga gipundokan sa mga tawo.

Dugang ni Baslan nga taudtaod na nga patay ang biktima gumikan kay anaa na kini sa state of decomposition ug posibling napadpad lang kini sa baybayon gumikan sa pagkabaluron sa kadagatan.

Apan ang kapulisan di pa makatumbok kon diin gikan ang patayng lawas tungod kay base sa ilang pagsukitsukit wa may nakaila sa biktima.

Dako og pagtuo ang kapulisan nga usa ka mananagat ang biktima gumikan kay naa pa sa iyang lawas ang gitawag og buya nga gamiton sa pagpanagat.

Matod ni Baslan nga way nagpa- blotter kanila nga dunay tawo nga missing. Gani, wa usab silay nadawat nga impormasyon kon may missing ba sa laing lugar o ba kaha sakayan nga nalunod.

Ang kapulisan niingon nga wa silay nakitang timailhan nga biktima sa krimen ang lalake apan di pa sila makasulti kon duna o wa bay foul play ang kamatayon sa biktima.

Tungod kay naa na sa state of decomposition ug way ni- claim sa patayng lawas, gilubong nalang gilayon ang biktima.

Padayon ang gihimong imbestigasyon sa kapulisan.