Kapulisan gitumong

ANG kagamitan ning lifestyle check mao ang pagsimhot sa baho sa pangurakot sa mga kawani sa kagamhanan. Dugay na kining gihimo. Dihay panahon nga ang mga kawani sa Bureau of Internal Revenue (BIR) giukay niini. Nikurog gud ang BIR kay diha toy nangasakpan.

Unya, miabot seguro ang kalaay sa pagpanggukod, kini nahanaw sa limaw natunaw.

Mibahakhak sa hilom ang ubang mga kurakot sa BIR kay nakaipsot. Busa padayon sa pagpaburot sa tiyan ang mga opisyal.

Karon ang kapulisan na say gitumong. Kini tungod sa ilang PNP Director General Alan Purisima nga natislaob sa nagbukal nga tubig kansang nawong nagngislo sa mga atake sa media nga makauuwaw.

Milihok si DILG Secretary Mar Roxas sa tinguha nga di mapiit. Mao ning lifestyle check karon sa kapulisan nga iyang gimando. Giuna, natural, si Purisima. Ang gipangbulgar niyang mga kabtangan giwiwi na karon.

Apan isog si Purisima, di sama ni VP Binay, kay nakigatubang sa imbestigasyon sa Senado. Wa siya mamilok sa iyang gisulti mahitungod sa mga balay didto sa 4.5 niyang yuta sa Nueva Ecija, sa iyang mga sakyanan ug white house nga iyang residencia sa Camp Crame.

Sobra ra kuno kaayo ang atake sa media. Kana lang white house gitukod kuno sa mga donasyon sa kahigalaan. Kini di iya kay alang sa tanan unya nga kapuyan sa mahimong PNP director general.

Apan angay ning tanawon kon kinsa kining iyang mga higala nga ninghatag og donasyon. Sa panahon karon nga ang mga pulis (di tanan) may koneksiyon kuno sa mga drug ug gambling lord isip protector di ta kaseguro kinsa ning mga donors.

Nakadiscount kuno siya og dako sa iyang napalit nga mga awto. Kini lalisunon pa. Hinuon, sa iyang stature isip PNP chief dunay posibilidad nga tinuod ning iyang gitugan sa imbestigasyon sa senado.

Di man sad ikalimod nga dunay mga pulis nga may mga negusyo nang daan sa wa pa sila makasud sa kapulisan. Ang uban nay lehitimong mga negusiyo. Kini makita unya sa task force nga moda sa lifestyle check. Si Kalihim Roxas mihagit sa task force nga iapil siya sa lifestyle check aron makitang katag.

Butang nga di dawaton sa task force kay ang tanan nasayod sa pamilya niya nga mga milyunaryo kay mga Araneta sa Manila.

Ang gikuyawan ron pagayo mao ang mga kurakot nga mga pulis. Ang mga buotan malipay kay mabulgar ang ilang mga kauban linsa may kalambigitan sa drug ug gambling business sa nasod.

Gawas kang Purisima, ang unahon mao kadtong klarong nadato nga mga pulis. Kadudahan kini kay kita nahibawo sa suhol sa mga pulis. Apan dunay mga abtik kay mogamit og dummies, busa di masakpan.

Apan ang nakapait mao ang kaluya unya sa task force sa pagpanggukod. Matunaw na sad ni sa linaw iniglabay sa panahon.