Kasumaran sa linog

TAKDO karon nga usa ka tuig sa pag-igo sa magnitude 7.2 nga linog sa Tungatungang Kabisay-an, diin ang grabing naapektohan mao ang lalawigan sa Bohol ug Sugbo. Sa Bohol ug pipila sa Sugbo, ang karaan ug makasaysayanong simbahan nangaguba lakip sa mga inprastraktura.

Diha sa pagbati ug hunahuna sa mga Bisaya, dili kadto malimtan nga kasinatian human unang higayon nga nakasinati ang rehiyon sa kusog kaayong pagtay-og sa yuta tungod sa paglihok sa fault duol sa lungsod sa Catigbian, Bohol.

Segurado nga daghan kitang kataw-anan nga reaksyon sa atong pagkatawhanon apan ang masakit nga pagbalik-lantaw sa uban nga nakab-san sa ilang mahal sa kinabuhi sama sa naninda sa kilid sa Pasil Fish Market sa dakbayan sa Sugbo nga nahugnoan og kongkretong gambalay.

Hinuon, mapasalamaton kita sa Kahitas-an, bisan sa Bohol nga nitala ang grabeng kadaot, nga dili daghang nakalas nga kinabuhi ug daling nakabangon ang rehiyon gikan sa pagbangotan sa hitabo.

Tinuod nga dili pa hingpit nahibalik ang mga inprastrakturang naguba ug mga edipisyo nga nahugno apan hinayhinay kining giatiman sa ahensiya sa kagamhanan ug nagpakabanang mga grupong sibiko ug relihiyuso lakip sa mga indibiduwal.

Nasayod ka ba nga ang samang linog o mas kusog pa posible nga moigo pag-usab sa rehiyon sa wala gikatakdang oras o panahon tungod sa faults sa Kabisay-an? Ang nakapasubo, lisod matagna ang lihok sa kinaiyahan bisan sa labing modernong kahimanan. Busa, unsa kita kaandam? May nakuha ba kitang leksyon sa atong kasinatian sa miaging tuig isip indibiduwal ug organisadong katilingban?

Ning unang anibersaryo sa linog, ang pagpangandam maoy atong angay tutokan labi na sa kagamhanan samtang naningkamot nga mahiuli ang normal nga panginabuhi sa katawhan.