Baruganan ni Cabarrubias

NALUWAS ni Konsehal Bob Cabarrubias uban sa mga kaubang konsehal sa siyudad sa Sugbo nga sakop sa Bando Osmeña Pundok Kauswagan (BOPK) aron di siya mahukasan sa mga komitiba nga ilang gihuptan, nagusbat sab ang dungog niini.

Nibalhin siya sa Team Rama gikan sa BOPK si Cabarrubias apan sa botasyon sa gihimong re-organisasyon sa mga komitiba, didto siya pabor ang boto sa BOPK. Ang nahitabo pabiling naghupot sa mga sensitibong komitiba ang mga kaalyado ni kanhi mayor Tomas Osmeña.

Mao nga angayang dawaton ni Cabarrubias sa pagtandi kaniya sa usa ka prostitute nga mabayran og kuwarta. Dunay mga pagduda nga ang pagbalhin niya sa Team Rama aron pagpirma nga makabaligya ang siyudad sa yuta sa South Road Properties (SRP) dunay nagpahiping motibo.

Karon sa iyang kalit nga pagbalit-ad aron mobalik sa kampo ni Tomas, nakakuwarta na sab kaha si Cabarrubias? Bisan og wala, siya ray nagbuling sa kaugalingon aron magduda ang mga tawo.

Apan ang labing makaluluoy sa pagtraydor ni Cabarrubias mao ang katawhan. Matanggong na sab sa konseho ang mga proyekto nga gitinguha sa kampo ni Mayor Rama ug si Tomas maoy nakaingon niining tanan.

WAY AKSYON SI PB OUANO

Morag lawom ni ang koneksyon ni Provincial Board Member Teddy Ouano sa ubang grupo, sama sa kalig-on sa iyang staff nga babaye nga wala niya tanduga bisan sa isyu sa pagpanghulga niini batok sa duha ka staff sa Mandaue City College (MCC) ubos ni Dr. Paulus Mariae Cañete. Naa na sa blotter sa kapulisan ug nigawas na gani sa media ang estorya. Atong maklaro nga dunay gihimong pagpanalipod ang mga pulitikong Ouano sa iyang mga tawo.

Nahitabo na kini nako kaniadto sa dihang gipadasmagan ang akong sakyanan sa pribadong sakyanan sa pulis nga batabata ni Konsehal Lollipop Ouano Dizon, dihang mayor pa sa Mandaue ang iyang amahan nga si Teddy.

Makaingon na ko nga molaban ug modupa gyud si Teddy sa mga kasaypanan sa iyang mga tawo.

Gani nanghambog pa si Emy sa pagpasaka ug kaso ngadto sa Ombudsman batok ni Cañete, ginamit ang pangan sa iyang opisina.

PASIUNANG LINE-UP?

Kon kini mahimong pormal ug opisyal, alegre ang pulitika sa siyudad sa Talisay alang karong 2016 nga eleksyon. Daghan og kapilian ang mga botante sa nagkainit nga pulitika sa maong siyudad. Kuwang na lang gani magpinahitay ang mga pulitiko.

Ang kasayuran nga akong nakuha gikan sa kasaligang tinubdan. Mag-uban si Mayor Johnny Delos Reyes ug Konsehal Allan Bucao, pagka besi mayor. Si Villarante nga besi mayor, mag mayor kuyog ni Konsehal Danny Caballero, sa pagka bise. Samtang mobalik si pagdagan si Eddie Gullas uban ni Konsehal Soc Fernandez.

Kon imong tan-awon, naa ang bintaha sa kampo ni delos Reyes human gipildi niini ang tang-an na kaayong pulitiko nga si Gullas sa miaging eleksyon.

Samtang si Villarante, kinsa wa modayon og dagan kaniadto sa pagka mayor human nahadlok ni Gullas. Karon naisog na si Villarante sa pagtuo nga makadaog siya human sa kadaugan ni delos Reyes? Unsay inyong tan-aw niini?