Surambaw nga terminal fee?
AMBOT kon giunsa kaha ni pagkuwenta sa gikatakdang grabeng pagsaka sa terminal fee diha sa Mactan Cebu International Airport Authority (MCIAA).
Pinaagi sa pahibalo sa general manager sa MCIAA nga si Engr. Paul Villarete, sugod karong Nobiyembre 1, ang terminal fee sa mga domestic passengers moabot na og P300 gikan sa P200. Samtang sa international flights, moabot na ngadto sa P750 gikan sa P550.
Sa tibuok Pilipinas, ang MCIAA na unya ang labing mahal og terminal fee ug lupigon niini ang Ninoy Aquino Intenational Airport (NAIA) sa Manila. Kini mayo usa ka butang nga lisod gayod masabot sa katawhan.
Nganong mas taas man ang atong terminal fee itandi sa kaulohan nga lupig man ang atong pasilidad? Nganong magkinahanglan pa man og dinalian nga pagtaas sa terminal fee Ang grupo in Villarete nga aduna man kahay total takeover sa GMR Megawide? Nganong mas taas man nga wala pa gani makita bisan anino nalang sa bagong tugpahanan?
Ambot kon wala ba kaha nasurambaw ang mao nga tinguha nga umento sa terminal fee? Hinumduman nato nga ang gobyerno nisulod sa kontrata sa katukoran sa airport pinaagi sa Public Private Partnership (PPP). Apan naunsa man hitaboa nga Kalit man kamahal ang terminal fee nga bisan wala pay nibarog nga usa ka haligi?
Kon gikinahanglan man gyod nga patas-an ang terminal fee alang sa kalamboan sa tugpahanan, unya na lang siguro kon naa na ang proyekto aron makuwenta ang kaangayan sa kantidad nga ipaningil ngadto sa mga pasahero.
Kuwartahan man kaha ang gobyerno? Kwartahan man kaha ang MCIAA isip usa ka GOCC? nganong hasulon pa man ang mga magbubuhis pinaagi sa pagbayad ug taas kaayo nga terminal fee?
Dili ba si kanhi tourism regional director Patricia Roa duna man toy nadala nga pabawon nga labing menus P500,000 sa wala pa miretiro? Dili ba nga gipabawnan siya sa rason nga daghan og kuwarta ang MCIAA?
Dili kaha kini maoy usa lamang sa mga motibo sa mga nagdali pagpatuman sa taas nga terminal fee? Nitingog naman ang mga Sugbuanon pinaagi sa lider niini nga si Gov. Hilario Davide Jr., magpadayon ba lang og lingoglingog ang mga responsabli niini sa MCIAA?
Kon gikinahanglan man gyod nga patas-an ang terminal fee alang sa kalamboan sa tugpahanan, unya na lang siguro kon naa na ang proyekto aron makuwenta ang kaangayan sa kantidad nga ipaningil ngadto sa mga pasahero