Mopasaylo ang gugma
NAGMUGTOK kanunay ang kalibutan ni Rodrigo. Ang iyang pagbati nagpandong og kangiob. Samtang ang iyang panan-aw kanunayng giyunyonan sa dag-om.
Lima na ka tuig nga nagbuwag sila sa iyang asawa nga si Judy. Daghan ang mga tambag sa kahigalaan ug sa iyang kabanay mismo nga pasayluon si Judy. Wa kuno makasala ang iyang asawa kaniya, ang kahigayunan maoy sad-an
Migahi na ang iyang balatian sama sa dakong panas nga di matandog sa tawhanong mga patid. Ang iyang asawa nakasala kaniya kay wa patalinghugi ang iyang kabalaka.
“Ayaw na lag kuyog sa procurement team ngadto sa bukid, Jud, kay kuyaw didto. Way siguridad.”
“Karon na lang higayuna, Drigs, kay gusto kong motan-aw sa bag-ong nahuman nga trading center sa among ahensiya; gawas pa, daghan kunog mga tanom didto, mamalit ko..” Wa na lang siya motingog. Igo lang siyang mitan-aw sa matahom niyang asawa kansang mga ngabil mibuklad og matamis nga pahiyom.
Ang iyang asawa maoy Accountant sa nasudnong ahensiya sa kagamhanan sa ilang lalawigan. Usa sa dakong kalihukan niini mao ang pagpamalit og humay sa mga mag-uuma aron galingon ug ipundo sa mga bodega sa kagamhanan.
Siya usa ka highway engineer sa DPWH sulod na sa napulo ka mga tuig. Gisangga sa kalipay ang ilang kaminyuon. Usa ra ang ilang anak nga nagtungha na sa high school. Kahamugaway sa panginabuhi ang iyang nasinati ning iyang kaminyuon.
Morag natumbahan siya niadto sa kalibutan dihang may nibalita nga ang procurement team diin uban si Judy gi-ambusan sa mga rebeldeng NPA. Midali siya pag-adto sa kapulisan. Didto nahibaw-an niya nga nagtambayayungay na ang militar ug kapulisan paggukod sa mga rebelde
Duha na ka buwan ang iyang asawa sa kamot sa mga rebelde ug wa pa mapalgi. Nagtuo siya nga patay na si Judy. Mihingos siya sa kasakit nga mikumot sa iyang dughan.
Apan usa ka gabii niana nahiuli ang iyang asawa. Buot niyang gakson apan giwakli siya. “Ayaw, di na ko angay kanimo.” Gisuhid niya ang tahom bayhon sa iyang asawa. Mibukal sa iyang pangisip ang pagduda. Uhaw ang mga rebelde!
Nanaog siya samtang mihawid ang iyang anak nga naghilak. Giwakli niya ang iyang anak kay giingugan siya sa nahitabo ni Judy. Kay tamparos sa iyang pagka bana. Duha ka buwan silang natagbaw sa iyang asawa, Midahunog kini sa iyang alimpatakan.
Ning buntaga migaan ang iyang dughan. Misanag pag-ayo ang kahayag sa kabuntagon. Gipasiklapan niya ang Graduation Souvenir Program sa tulonghaan nila ni Henry diin may sukip nga note sa iyang anak. “Akoy valedictorian, tambong baya, Dy.”
Gituyo niya nga ma- late sa programa. Sa bantawan nakita niya ang iyang anak nga namungingi sa mga medalya nga gitaod sa iyang asawa. Nahimut-okan siya sa gisul-ob ni Judy nga bestidang puwa nga giburdahag puti. Nahinumdom siya nga kini ang gisul-ob sa iyang asawa Sa Valentine’s Day dihang siya gisugot niini. “I love you so much, Drigs!” Nakasabot siya karon.
Nakakita niya si Henry ug midagan padulong kaniya. “Daddy, nako bag di ka motambong.” Gigakos niya ang iyang anak, “Congrats, Dong Henry, kagarbo nako!” Miduol si Judy nga nagpahiyom nga misamot katahom sa iyang gisul-ob. Wa siya kapugong; iya kining gigahos piit kaayo, “Jud, I love you!” Mibakho si Judy. “Yeheee!” misinggit si Henry nga nakapalingi sa daghang tawo kanila.