Isig kaingon
Dear Papa Joe,
Ako si Biebie, 16 years old, gatrabaho as a cashier sa usa ka salon diri sa Cebu. Magtulo pa lang ko ka buwan diri. Mao ni ang akong gusto ipadayag nimo. Isip isa ka babaye, kuyaw ang maibog sa kapwa nako nga babaye. Hilabi na nga di sad ko laki moporma. Naibog ko sa usa ka babaye nga kauban ra nako sa usa ka balay. Pag-umangkon siya sa akoang amu.
Sa sugod, gihunahuna ra nako nga normal ra nga magamiga. Nagkadugay nagkalawom man hinuon akong gibati niya. Sa panahon nga nanginahanglan ko og tabang, naa siya permente ug ingon ana sab ko niya. But-an kaayo siya nako. Pero minglabay ang mga adlaw, nahibaw-an na lang nako nga naibog diay siya sa usa ka lalaki nga amo ra pud silingan.
Sa pagkahibaw nako ana, wa ko kasabot sa akoang gibati. Sakit nga wa ko kasabot. Didto na nako namatikdan nga lahi na diay ni. Tambagi ko palihog kon maayo o di ba ning akong gibati karon? Gubot kaayo akoang panghunahuna sa pagkakaron. Salamat.
BIEBIE Biebie,
Mas maayo na nga mangaliya sa ka sa Labawng Makagagahum kon kanang gibati nimo imo ba o bunga lang sa selos isip higala. Kay bisan kaming mga lalaki, kon naa miy close nga amigo, maglagot sad mi kon mawala namo isip barkada kay ang mga naandang jamming o lingaw mawala man. Basin mao ra na ang imong gibati mao nga ayaw sa og conclude nga lesbian ka.
Matod pa nimo di sab ka lalaki mamorma. Mao basin bunga lang na sa selos sa usa ka best friend. Usa pa, di man mo uyab kon ibutang nato nga tomboy ka ug wala kay katungod mag selos kay wala moy intimate nga relasyon sa usag usa. Siya dunay katungod nga mamili kon si kinsa ang iyang higugmaon. Buot hunahunaon imong dawaton kay ang tinuod, bisan gani lalaki mapakyas sa pagpadayag, unsa pa kaha nang pasumbingay lang. Busa klaruha sa nang imong gibati kay labaw sa tanan bata pa kaayo ka. Daghang salamat.