Back to you and me
NAKAPANGLINGO ko. Hilom kong nakapahiyom. May gitago diay si Gina nako. Sa akong nakita ron sa akong amiga ug sa kauban niyang lalake sa ilang lagwerta, klaro nga duna silay relasyon. Matay, uy, may boyfriend man diay ang akong friend?
Karon pa ko makakita sa maong lalake. Sweet kaayo sila nga nagtupad og yaka sa Bermuda grass. Every now and then, kusog silang mangatawa. Unya nakalingi si Gina nako. Dali siyang mitindog ug iya kong giduol. “Sus, wa ka man lang mosangpit nako, Mayeth? Ganina ka ra dinhi?” Mikidhat si Gina nako dayong lingi sa kauban niyang lalake nga nagtan-aw namo. Mitindog sab kini pero nagpabilin sa iyang nahimutangan.
“Ganina ra, uy, Gin. Nakita ko kaayo ang inyong kamalipayon.” Gipabudlot ko ang akong simod tumong sa maong lalake. Mikatawa ang akong amiga. “Ah, si Dexter? Ipaila-ila tika niya.” Gipasulod ko ni Gina sa gate nga rehas sa ilang lagwerta. Gidala ko niya ngadto sa kauban niyang lalake nga ligdong ang nawong nga nagtan-aw nako. Bisag wa siya magpahiyom, pero nasuta ko nga gentleman siyang pagka tawo. Guwapo sab siya, uy! “Dex, akong close friend, si Mayeth.” Unya si Dexter na sab ang gipaila ni Gina ngari nako. Dinhi pa mopahiyom si Dexter. “Nice meeting you, Mayeth.” Igo lang kong mipahiyom. Morag gibati ko ang kabakikaw dihang gilamano ko ni Dexter. “Sige, mopauli na ko, ha? May lakwon pa ko.” Sa dayong biya ni Dexter namo ni Gina, mipasiplat siyag tanaw nako. Nagpabilin ko sa akong nahimutangan kay gihatod man siya ni Gina hangtod sa pultahan sa gate sa lagwerta. Klaro nga malipayon gyud kaayo ang akong amiga. Mapahiyumon kaayo siya nga mibalik nako dihang wa na si Dexter.
“Ikaw, ha, maldita gyud. Duna ka man diay gitago nako. Boyfriend mo si Dexter, no?” Gihan-an kog kusi ang kilid sa akong amiga. Nagkatawa siyang milikay. “Ay, oo, uy. Bag-o ko pa lang siyang gisugot.” “Diin man mo magkaila, Gin?” “Sa SM. Nag-eskuwela pa ta sa hayskol. May gipalit ko sa SM dihang nabanggaan ko niya. Morag salida sa sine, no?” Mikatawag kusog si Gina. Nahimuot na lang kong nagtan-aw niya. “Tuod diay, Mayeth. Kuyog ta karong Sunday, ha? Adto ta sa ilang Dexter.” “Ha?” Nakugang ko. “Mag-unsa man ta didto?” “Birthday niya. May party.” “Sige.” Pagka Domingo sa pag-adto na namo ni Gina, si Dexter gyud ang nag-asikaso namo.
(SUMPAYAN)