Depensa ni coach

HUMAN sa pipila ka semana nga pakihilum, mipagawas na gyud og pamahayag ang kontrobersiyal headcoach sa Gilas Pilipinas nga si Chot Reyes.

Iyang giangkon nga nasakitan gyud siya sa ataki sa mga fans ngadto kaniya ug pilit kini niyang dawaton.

Hinuon wa kalikayi nga naapektohan ang iyang pamilya ug mga suod sa iyang kinabuhi kalabot sa grabing mga pagsaway ngadto kaniya.

Sa interview sa spin.ph, iyang gitagsatagsa pagtubag ang mga isyu. Kalabot sa pagka- disqualify ni Andray Blatche iyang giingon nga kompleto sila sa komunikasyon sa mga organizers nga qualify si Blatche apan kalit kining giusab.

Sa pagsugo ni Marcus Douthit nga iitsa ang bola ngadto sa ring sa kontra sa tuyo nga ma- overtime ang duwa kini maoy bunga sa ilang tinguha nga makasulod sa sunod round.

Apan ang bag-o niyang gipakatap karon mao nga ang players diay kuno maoy naglagot ni Douthit sa ilang kapildihan sa Qatar hinungdan nga iya kining gibangko sa sunod nilang duwa batok sa Korea.

Pastilan si coach. Mosamot og kalagot ang mga tawo kon magsigi na lang ni siya og pamahid sa mga kasaypanan. Ikaw may headcoach di imo ang responsabilidad.

Dili ka mopaulbo sa sitwasyon kon tinuod man gani na imong gisulti.

Abi nato og ang iyang unang pamahayag human sa tulo ka semana nga pagpakahilum mao ang pagpahibawo nga siya moluwat na isip headcoach sa Gilas nga maoy giampo sa mga kinabag-ang mga fans, dili man diay.

Ingon niya nga iya kining itugyan ngadto sa top management sa Gilas ug kon unsay desisyon andam siyang mo respeto niini. Mora man og magpahawid si coach.

Sa ato pa, gipalabi niya nga ang management nay mopapha niya sa maong puwesto kay sa siya ang boluntaryong moluwat.

Dili sab gyud angay hingpit tangtangon si coach Chot sa Gilas kay siya man gyud ang naghago ug suheto na usab kaayo sa programa niini apan dili na siguro

headcoach.

Angay ikonsiderar sa

Gilas management ang

panawagan sa mga fans niini kay kini maoy naghatag og kadasig sa kinatibuk-ang

puwersa sa team. Total alang man usab sa atong yutang Pilipinhon.

(junmigs0622@yahoo.com)