COBRAS NAKAUNA
KALIT lang nanginit ang mga kamot ni Jovanie Luz sa 2nd quarter aron pabulhoton ang opensa sa Southwestern University (SWU) Cobras paingon sa 59-55 nga kadaugan batok sa University of San Carlos (USC) Warriors sa Game 1 sa best-of-five championship series sa Cebu Schools Athletic Foundation Inc. (Cesafi) college
division sa Cebu Coliseum. Ang Warriors ni coach Junthy Valenzuela mao ang nagkontrolar sa duwa sa sayong bahin ug nakaposte sila’g 12-8 nga labaw human sa
1st quarter.
Apan sa 2nd quarter, nagpabuto og tulo ka sunodsunod nga three-point bombs si Luz aron pangulohan ang 15-4 nga rally sa Cobras nga naghatag kanila og 23-16 nga labaw. Ming-abag sila si Mark Jayven Tallo, ug
import Landry Sanjo kang Luz aron protektahan ang maong labaw hangtod na sa halftime.
Nagpadayon ang kainit sa opensa sa Cobras sa 3rd quarter. Ang duha ka sunodsunod nga three-point shots nila ni Tallo ug Melvin Holper mao ang naghatag sa Cobras sa ilang labing dakong labaw, 43-28, sa nahabiling 4:19 minutos.
Nagkumboya sila si Christian Laude, Victor Rabat, imports Shooster Olago ug Espoir Toyambi aron pukawon ang opensa sa Warriors ug pahakan ang labaw sa Cobras, 36-45, pagkahuman sa 3rd quarter.
Si Kiefer Lim, kinsa bugnaw og duwa sa nag-unang tulo ka quarters, nakamugna og upat ka sunodsunod nga puntos unya nakakompleto pa og three-point play si Olago ug nakasikit pa’g samot ang Warriors, 45-47, sa nahabiling 5:31 minutos nga nakapaugyaw ug nakabuhi og balik sa ilang mga sumosunod.
Niadtong mga higayuna nagproblema ang Cobras ni coach Raul “Yayoy” Alcoseba gumikan kay na- foul trouble si Sanjo sa sayong bahin sa 4th quarter hinungdan nga naahat silang palingkuron kini.
Samtang wala pa si Sanjo, sila si Luz ug Tallo una ang nag-agak sa Cobras ug nainat nila’g gamay ang ilang labaw, 50-45.
Sa pagbalik ni Sanjo, nakabulhot na sab ang opensa sa Cobras aron inaton pa’g samot ang ilang bintaha, 54-46, sa nahabiling 2:51 minutos.
Wala dayon moisa sa ilang bandera ang Warriors ug ningmugna kini’g upat ka sunodsunod nga puntos aron pahakan ang labaw sa Cobras, 50-54, sa nahabiling 1:52 minutos.
Apan wala nakalahutay ang Warriors gumikan kay aduna may tubag ang Cobras sa katapusan nilang hunat sa ilang opensa.
Si Luz, kinsa kanhi sakop sa Far Eastern University (FEU) Tamaraws sa Manila, nimugna og 15 puntos aron pangulohan ang kadaugan sa Cobras, nidugang og 13 puntos si Sanjo samtang nitampo og siyam ka puntos si Tallo.
Ang Warriors gipangulohan ni Olago pinaagi sa iyang 16 puntos, nitampo og siyam ka puntos si Charles Pepito samtang nihatag og pito ka puntos si Rabat.
Sa presstime kagabii, padayon pang nagsangka ang Cobras ug Warriors sa Game 2 sa
series sa samang venue.
Puntos matag usa
SWU (59) - Luz 15, Sanjo 13, Tallo 9, Bregondo 8, Parker 4, Valdor 4, Holper 3, Goloran 2
USC (55) - Olago 16, Pepito 9, Rabat 7, Laude 5, Lim 4, Toyambi 4, Tagapan 3, Laguyo 3, Asuncion 2, Bensig 2.