City treasurer sa Talisay gibalhin
ANG Talisay city treasurer gihulipan ug gibalhin og destino ni Mayor Johnny V. de los Reyes tungod sa giingon niyang mga kasungian.
Si Emma Macuto niangkon nga nasakitan siya sa paghulip kaniya sa katungdanan ni Delos Reyes nga iyang gidudahang tungod sa pulitika.
Gikan sa City Treasurer’s Office, gibahin siya sa Tabunok Public Market.
Unang gipalagpot sa puwesto ang anak ni Macuto nga si Hazel Bathan, pangu sa Human Resource Department.
Si Macuto emosyonal nga miatubang sa Sun.
Star Superbalita ug nipahibawo sa kamandoan sa mayor nga sugod kagahapon madistino siya sa merkado sa Tabunok.
Gimandoan usab siya sa pagturnover sa mga record ug ubang mga dukomento sa gitudlo sa mayor nga kasamtangang city treasurer nga si Dalisay Gabriel.
Siya niingon nga wa siya magdahum nga sa 30 ka mga tuig niya sa puwesto, karon pa nahitabo ubos ni de los Reyes nga siya nabalhin.
Kini ang hinungdan nga gisakitan siya sa gibuhat sa mayor kaniya.
Iya nang gikonsulta ang iyang abogado alang sa legal nga lakang ingon man ang iyang labaw sa Bureau of Local Government Finance (BLGF)sa Department of Finance kon sakto
ba ang gihimo sa mayor.
Si de los Reyes nga nahinabi sa Sun.Star Superbalita niingon nga iya lang unang gipabalhin si Macuto sa puwesto samtang nagpadayon pa ang pagaudit tungod kay daghan silag nakita nga mga “discrepancy” ubos sa iyang pagdumala sa buhatan.
Wa mohatag si de los Reyes kon unsa nga discrepancy ang iyang nakita.
Iya usab nga gihimakak nga may labot sa pulitika ang iyang balhin kang Macuto.
Si Macuto niingon nga wa siya masayod nga adunay imbestigasyon kaniya.
Iyang giawhag ang mayor nga ipahibawo kon unsa nga ang gipasabot niyang discrepancy aron iya usab nga matubag.
Gumikan sa lakang sa mayor, dunay mga tseke nga wa mapirmahi sanglit usa man si Macuto sa mga signatory.
Usa sa mga steke ang sa Liga ng mga Barangay nga moakabat sa P500,000.
Matod ni de los Reyes nga iyang awhagon ang konseho nga motudlo lang unag tawo nga maoy mopirma hulip kang Macuto aron marelease ang tseke.
Apan si Bise Mayor Romeo Villarante nga nahinabi sa Sun.Star Superbalita
niingon nga sayop ang gihimo sa mayor nga way pagpananghid sa BLGF sanglit wa kini sa iyang gahom.
Matod ni Villarante nga lain na usab kining lakang sa mayor nga adto na usab unya ipahid sa konseho sa higayon nga di matuman ang iyang gusto.
Iyang giawhag si Macuto nga mopasakag kaso ngadto sa Ombudman o ba kaha sa Civil Service Commission sanglit ang gihimo sa mayor usa ka matang sa constructive dismissal.