3 KA LALAKE, MABDOS SIKOP

Dalaga maoy pusher sa amahan

TULO ka mga lalake ang nasikop sa managlahing mga operasyon sa kapulisan sa lalawigan sa Sugbo niadtong Biyernes batok sa ginadiling drugas.

Sa dakbayan sa Sugbo, usa ka 18-anyos nga dalaga gigamit sa iyang amahan isip drug pusher.

Nasakmit ang dul-an sa P200,000 nga kantidad sa shabu gikan kang Johannes Pacquing, alyas “Jojo,” human nasikop sa usa ka buy-bust operation sa Toledo City Police Station.

Alas 3:55 sa hapon dihang gipahigayon ang buybust pinaagi ni PO1 Readan Lara isip poseur buyer kang Pacquing.

Human makapalit ang maong pulis sa suspek gamit ang buy-bust money, dali dayon siyang ni- signal sa iyang kauban nga pulis nga positibo sa negosyong ginadiling drugas si Pacquing.

Ang 31-anyos ilado nga pusher sa Tinahas, Media Once sa dakbayan sa Toledo.

Pinangulohan ni PInsp. Jovito Labra ang operasyon, diin nasakmit nila ang duha ka gagmay nga pakete ug dagko nga pakete sa shabu nga aduna’y gibug-aton nga 15 gramos o P170,000 ang Dangerous Drugs Board value.

Samtang ang kauban sa suspek nga si Jun Dave Alferez, 22-anyos, residente sa Pandong Bato lakip nga nasikop human nakuhaan og usa ka dako nga pakete sa shabu.

Pipila ka oras sa wa pa ang buy-bust, nasikop usab si Jose Cabrera, 20, lumad sa Bag-ong Dan, Yati, Liloan.

Si Cabrera nasikop sa District 4, Barangay Pulpogan, lungsod sa Consolacion human gilabay ang usa ka gamay nga pakete sa shabu dihang nakakita sa nag- roving nga kawani sa barangay.

Dali nga gidala ang suspek sa Consolacion Police Station. Pasakaan og kasong kalapasan sa Republic Act 9165 o ang Comprehensive Dangerous Drugs Act.

Kasamtangan nga natanggong ang mga suspek sa prisohan.

Samtang nasikop sa mga sakop sa Criminal Investigation and Detection Group (CIDG7) ang 18 anyos nga pito ka buwang mabdos human nakuhaan og illegal nga drugas.

Si Nicole Ann Maloloy-on, taga sitio Tugas, Barangay Mambaling sa siyudad sa Sugbo, nasikop atol sa anti drugs operation sa CIDG 7 sa maong dapit pinasikad sa search warrant nga giisyu ni Regional Trial Court (RTC) Judge Soliver Peras.

Ang subject sa search warrant mao ang amahan ni Nicole nga si Bador, apan nakaikyas pag-abot sa mga operatiba sa CIDG-7.

Matod ni Supt. Fermin Armendarez III nga maoy nangulo sa raid nga duha ka buwan nilang gipanidan ang illegal nga negosyo ni Bador.

Kasagaran sa mga customer niini mga tinun-an sa high school ug college nga naa duol sa barangay Mambaling.

“Duha ka buwan ang atong surveilance and monitoring human nato madawat ang tip sa usa ka concerned citizen,” matod ni Armendarez.

Si Nicole maoy himuong runner sa iyang amahan sa mga gustong mogamit sa illegal nga drugas.

Lakip sa nasikop ang live in partner ni Nicole nga si Jumbert Aleomar Suson ug ang ilang silingan nga si Jeorico Mantilla.

Matod ni Nicole nga napugos siya sa pag- runner aron naay ikagasto sa iyang pagpanganak.

“Maayo na lang unta makakwarta mi og gamay para manganak nako kay wala ra ba koy trabaho. Pila ra man sad ang kita sa akong live in partner oy,” sigon ni Nicole sa Sun.Star Superbalita.

Iyang giangkon nga ang iyang amahan maoy modala sa drugas apan siya ang mobaligya.

Sulod sa gamayng lawak diin kasagaran ang transaksyon himuon, dunay gimontar nga close circuit television (CCTV) camera aron ma- monitor ang mga tawo nga nagpadulong nga mosulod sa kwarto.

Apan sa pag-abot sa mga operatiba sa CIDG-7 nasurprisa ang mga dinakpan ug wa na makaikyas gikan sa mga pulis.

Mokabat sa 26 ka ka mga pakete ug usa ka medium size ang nakuha sa sud sa kwarto lakip na ang usa ka .22 caliber pistol.

Si Kapitan Wilfredo Go usa sa mga saksi sa operation ug sa gihimong pag- search sa panimay.

Ang mga suspek mag-atubang og sumbong nga kalapasan sa Republic Act 9165.