3 ka dagkong karsada ayuhon
LAING trabaho na usab sa mga karsada ang gipaabot nga makabara sa dagan sa trapiko dinhi sa dakbayan sa Sugbo.
Ang mga pagayo sa mga karsada dinhi sa dakbayan iya sa Department of Public Works and Highways (DPWH).
Ang maong mga proyekto gipaabot nga sugdan karong buwana ug matapos tulo ngadto sa lima ka mga buwan.
Ang road concreting himuon sa mga dalan Doña Modesta Gaisano paingon sa Beverly Hills, Lahug; Calderon st., paingon sa Carbon Market ug R. Cabahug st., tupad sa APM Mall sa North Reclamation Area nga duol sa impounding area sa kagamhanan sa Siyudad.
Matod pa sa pahibawo sa Cebu City Transportation Office (CCTO) nga maagian ang Dona Modesta st., apan usa na lang ka lane ang magamit ug magpulipuli ang magsugat nga mga sakyanan.
Tipik sa plano sa DPWH nga maghimo og laing dalan nga temporaryong maagian sa mga sakyanan nga maglabyanan sa Doña Modesta.
Giawhag ang mga motorista nga mo- short cut paingon sa Sudlon, Lahug nga mogamit sa naandan nga dalan gikan sa Escario paingon sa Lahug.
Samtang pakigtagboan pa sa DPWH ang apektado nga establisemento sa pagahimuon nga proyekto sa R. Cabahug.
Maapektuhan sa proyekto ang APM Mall ug ang duha ka mga yarda sa mga container van.
Kon makabot na ang kasabutan, sugdan dayon ang proyekto sa DPWH nga gipatrabaho sa Blimex Construction.
Samtang gikatakda nga adunay pagahimuon nga re-routing sa mga sakyanan palibot sa Carbon Market tungod sa road concreting sa dalan Calderon.
Paningkamutan sa DPWH nga mahuman ang maong proyekto sa di pa ang International Eucharistic Congress (IEC) ug Sinulog 2016.
Giawhag sa CCTO ang mga motorista sa pagplano sa ilang mga biyahe ug rota nga maapektuhan sa maong mga proyekto kon kini kasugdan na aron malikayan ang traffic.