'Suyop' sa drugas miugdaw sa 60 ka mga pinuy-anan

NAGTUO ang mga molupyo nga adunay nagsuyop sa balay diin nagsugod ang sunog nga niresulta sa pagka-ugdaw sa 48 ka mga balay sa miaging adlaw sa sityo Cadahuan, Barangay Talamban, dakbayan sa Sugbo.

Si Fire Officer 3 Novo Erana, fire investigator sa Bureau of Fire Protection, (BFP), niingon nga nagsugod ang kayo sa balay nga gipuy-an ni Richard Hermoso, kapin sa 20 ang edad.

Si Hermoso hangtod ning pagsuwat wa pa igkita sa imbestigador.

Ang BFP nibanabana nga niabot ang danyos og P200,000 sa mga balay nga ginama sa light materials.

Base sa report sa mga silingan, ang maong balay gihimo nga suyopanan sa lugar apan ang mga bombero wa pa makakumpirmar sanglit nagpadayon pa sila sa ilang imbestigasyon.

Samtang ang mga pulis di usab makadakop kang Hermoso ug sa iyang kauban sanglit wa silay gihuptan nga ebidensya.

Si Dr. Ester Concha, pangulo sa Department of Social Welfare and Services (DSWS), nagkanayon nga niabot og 274 ka mga individual ang apektado sa sunog nga nilanat og 10 minutos.

Ang mga tawo kasamtangan nga gipa-istar sa sports complex sa barangay diin ang DSWS nihatag og libreng pagkaon sukad pa sa niaging gabii nga molanat hangtod tulo ka mga adlaw uban sa paghatag og libreng starter kits.

Matod sa pangulo sa DSWS nga nagpadayon pa sila og validate sa mga pamilyang nasunogan uban sa paghatag og financial assistance ug housing materials.

Gipadayag ni Concha nga ilang paningkamotan nga mahatag sa Cebu City Government ang tag P10,000 nga livelihood assistance alang sa mga biktima karong Lunes.

Ang konsehal sa dakbayan sa Sugbo nga si Alvin Arcilla, kinsa nagpuyo sa maong barangay, nanawagan sa mga tawo nga adunay malumo nga kasingkasing sa pagtunol sa ilang hinabang alang sa nasunogan.

“Friends, if there’s anything you can do to help... anything to spare - food, clothes, school supplies, household necessities - you may give them directly to the affected families at the above-mentioned areas or bring it to the Talamban Barangay Hall,” tipik sa post ni Arcilla sa iyang Facebook account.