JVR mitudlo sa assistant ni Macuto isip hulip
HUMAN magdumili sa pagbiya sa katungdanan si City Treasurer Emma Macuto bisan og gihulipan na ni Mayor Johnny delos Reyes, ang mayor nitudlo gihapon og bag-ong city treasurer.
Si de los Reyes nipagawas og draft resulotion nga nagtudlo kang Anunciacion Ante, assitant city treasurer, nga maoy makapirma sa mga tseke ug transaksyon sa city treasurers office ug di na si Macuto.
Ang resulusyon gitunol ngadto sa buhatan ni Konsehal Edward Alesna, kinsa maoy chairman sa budget and appropriations ug ways and means, aron matuki atol sa ilang session karong Martes.
Apan si Macuto nipahibawo nga di na siya mobiya sa puwesto hangtod nga ang iyang mga labaw sa Bureau of Local Government Finance maoy momando nga kini biyaan aron di siya maoy manubag.
Niadtong Biyernes, si Macuto namirma na sa mga tseke nga anaa sa iyang buhatan.
Siya nipahibawo nga di niya tumanon ang mando sa mayor nga naghulip kaniya tungod kay di siya ubos sa kamandoan ni de los Reyes.
Si BLGF regional director Herminigilda Garsula nimando kaniya sa pagpabilin kay way gahom si de los Reyes sa pagbalhin kaniya.
Matod ni Macuto nga mag-agad usab siya sa desisyon sa iyang mga abogado kon unsay sunod nilang lakang ilabi na ang pagpasakag kaso sa mayor sa gihimo niining pagbalhin sa puwesto kaniya.
Niadtong miaging adlaw, ang abogado ni Macuto mipadala na usab og suwat sa buhatan ni de los Reyes nga bakwion ang iyang gipadalang memorandum ngadto kang Macuto sa samang rason nga way gahom ang mayor sa paghimo niini.
Si Konsehal Edward Alesna niingon nga magtagbo silang mga konsehal aron hisgutan ang draft resolution nga giduso sa buhatan sa mayor ngadto sa iyang buhatan.
Matod niya nga nahibawo usab siya nga ang pagtudlo ug paghulip sa usa ka city treasurer wa sa gahum sa mayor.
Hinuon mahimo kining mohangyo ngadto sa BLGF nga pahulipan ang iyang city treasurer kon unsa man ang rason sa mayor.
Gibutyag ni Macuto nga sigun sa iyang pakisusi sa iyang mga labaw, labina ni Garsula, way suwat ang mayor nga gipadala ngadto sa ilang buhatan nga naghangyo paghulip kaniya.
Matod sa mayor nga ang iyang kamandoan pagbalhin ni Macuto sa merkado sa Tabunok usa ka internal nga kamandoan.