Mga bata gilingaw sa mayor pinaagi sa tour

LAPULAPU City Mayor Paz Radaza migahin og panahon aron makigbonding sa mga bata gikan sa home care center sa dakbayan sa usa ka museum sa dakbayan sa Cordova kagahapon sa hapon.

Moabot ngadto sa 47 ka mga bata sud sa home care facility sa dakbayan ang gilingaw mismo sa mayor sud sa Cebu Happy World Museum.

Matod ni Letecia Patalinghug, center head sa home care, nga ang maong kalihukan lakip sa educational tour sa mga bata sud sa ilang pasilidad.

“Importante gyud ni sa mga bata kay exposure man ni sa community, ug sa mga places sama niini,” ni Patalinghug sa dihang nahinabi sa mga tigblita kagahapon.

Dugang niya nga di kini maoy unang higayon nga nahimamat sa mga bata ang mayor tungod kay usahay mobisita si Radaza sa ilang pasilidad.

Human sa tour sud sa museum, gipakaon usab sa mayor ang mga bata sud sa usa ka fastfood chain sa wa pa niadto sa Crimson Hotel alang sa panihapon.

Nasuta sa Sun.Star Superbalita nga personal nga kwarta ang gigahin sa mayor aron malipay ang mga bata nga nagedad og 6 anyos pataas.

Sa dihang gikuhaan og habig, gitataw ni Radaza nga dugay na niya nga plano nga mogahin og panahon sa mga bata.

“Sige lang ni ug kapostpone. Timely lang sad ni karon kay Children’s month man ron so amo ning gipadayon kay naschedule na man,” ni Radaza sa mga tigbalita.

“I’d like to treat them nga sama sa usa ka ginikinan nga naa sa balay nga dadon usab og outing ang mga bata,” dugang sa mayor.

Ang LapuLapu City Homecare Center maoy nahimong dangpanan sa mga bata nga gipangabuso (sekswal ug pisikal), gibiyaan sa ginikanan ug mga children in conflict with the law, saysay ni Patalinghug.

Kini nagsugod sa ilang operasyon sa dakbayan niadtong 2009.

Gawas sa mga aktibidad nga ilang gihimo alang sa mga bata, ila usab kini nga gipatungha og libre sa maong pasilidad.