Kahimtang sa trapiko sa Sugbo sa Apec gidayeg

GIDAYEG sa Asia Pacific Economic Cooperation (Apec) National Organizing Council ug local officials sa kaulohan ang mga lakang nga gihimo sa Sugbo aron kapangandaman ang hosting sa pipila ka meetings.

Usa sa gidayeg ang gihimo nga traffic management dinhi atol sa usa ka buwan nga kalihukan.

Ang tigpamaba sa Kapitolyo nga si Ethel Natera giimbitar sa Malacañang niadtong Septiyembre 28 aron ipaambit sa 17 ka mga LGU sa kaulohan nga maoy mohost sa dugang Apec meetings karong Nobiyembre.

Gi- report ni Natera ang mga initiative nga gihimo sa Sugbo alang sa pagpromote sa mga kalihukan ug bintaha sa pagkasakop sa Pilipinas sa Apec.

Lakip sa gidayeg sa iyang audience ang gihimo sa Cebu Organizing Committee nga paghimo nga accessible sa tanang mga impormasyon nga may kalambigitan sa kalihukan.

Gawas niini, gidayeg sab ang security measures ug koordinasyon nga gihimo sa Sugbo sa tanang komitiba ug ahensiya sa gobiyerno nga dunay papel sa Apec meetings.

Apan sumala ni Natera, labing nagustuhan sa ApecNOC ang gihimo sa Sugbo nga traffic management atol sa Apec meetings.

Gidayeg ang paspas nga travel time sa mga delegado ug ang pagsakripisyo nga dili paagian og mga PUJ ug dagkong mga trak ang pipila ka mga dalan nga maagian sa mga bisita.

Tungod sa nindot nga mga initiative sa Sugbo, giingong plano karon sa mga organizer sa Apec nga himuong template ang mga kalihukan sa Sugbo sa ubang dapit nga mohost pa sa dugang mga panagtigom.

Ang Sugbo subling mohost sa duha ka mga Apec ministerial meetings karong Oktubre 8- 14.