Wala kaha masayop si JVR?
POSIBLE nga motumaw na usab ang kontrobersiya sa dakbayan sa Talisay nunot niining temporaryong pagbalhin ni Mayor Johnny Delos Reyes ni City Treasurer Emma Macuto. Si JVR mipagawas og kamanduan nga magbalhin kang Macuto ngadto sa Tabunok Public Market. Kini pinasikad usab sa matod pa kamanduan sa Commission on Audit (COA) gumikan kay gipaubos sa imbestigasyon si Macuto gumikan sa matod pa mga kahiwi-an. Ambot kon aduna ba gyoy kamanduan kaha ang COA?
Ang mga city treasurer ubos sa Bureau of Local Governemnt Finance (BLGF) nga ubos sa Department of Finance. Apan matod ni Hilda Garsola nga sayop ang gihimo ni JVR kay ang mga local chief executives di makapabalhin ug makatangtang sa mga city treasurer. Igo lang silang morekomendar sa pagpabalhin. Una, uyon ra unta si Macuto ug iya kining gidawat apan sa dihang gi-ingan siya ni Garsola nga magpabilin, wala na siya motuman sa kamanduan ni JVR. Wala kaha masayop si JVR sa iyang gihimo? Wala na pod siya mokonsulta sa iyang mga abogado sa wala pa siya mohimo sa maong lakang? Karon mi-ingon si JVR nga iyang pasuwaton si City Legal Officer Alfredo Sipalay ngadto sa BLGF. Tan-awa ra, nagbuot-buot lang si JVR.
BULILYASO
Wala ako makaila personal niining Macuto apan naka-simpatiya ako sa iyang gidangatan. Biktima lang siya sa pulitika gumikan kay gituhuan nga supporter siya ni kanhi Kong. Eduardo Gullas. Wala kaha masayop si JVR? Morag tan-aw nako mamahimo kining kontrobersiya. Unsa-on nga magpataka man lang si JVR usahay.
REKLAMO
Ania kitay nadawat nga reklamo gikan sa atong suking bumabasa nga si Victorio Camus <julyvictorio2014@gmail.com> Sir Bob,
Ako si July Victorio taga San Isidro, San Fernando, Cebu usa sa imong sumusonod labi na sa imong lindog sa Superbalita. Magpatabang unta mi nimo parti aning among problema diri sa among dapit kay naa man guy sapa diri (taytayan). Ang problema ani kay gikural man gud ni kay dunay building nga tukoron atobangan sa sapa. Ang problema ani kay wala nay kalotsan sa tubig. Unyag baha ani, ari sa karsada ang tanang tubig ug padulong sa kabalayan.. Ambot unsay nasod sa utok aning among kapitan nga giaprobahan man sad ni niya. Wala maghuna huna sa risgo kon naay baha. Nitawag kog suway sa DPWH pero dili man sila mo entertain kon walay pormal nga reklamo. Ang amo lang unta nga matan-aw nila ang sitwasyon sa taytayan. Sir Bob tabangi intawn mi ani kon naa kay kaila sa DPWH para ma aksyonan ni.
(Oh, attention mga local officials ug DPWH).