Nangayo nag pasaylo si Poe?
KAPIN na sa 10 ka tuig ang milabay dihang gipasanginlan ni Grace Poe ang mga Sugboanon nga nanikas hinungdan nga napildi ang iyang amahan nga si anhing Fernando Poe Jr.
Di ko makatuo nga wa masuginli ang senadora kon unsa gyud ang tinuod nga hinungdan nganong napildi ang iyang amahan dinhi sa Sugbo.
Kaniadtong 2004, wa maninguha nga makakuha og dagkong lider ang kampo ni FPJ dinhi sa Sugbo. Nagsalig siya sa usa ka giingong lider apan way organisasyon dinhi sa Sugbo. Tuod man, ang mga dagkong lider sa lalawigan nga sila si Gwen Garcia, Johnjohn Osmena, ug Junnie Martinez nagdala kang Presidente Gloria MacapagalArroyo.
Binuang man sa usa ka lider ni FPJ dinhi sa Sugbo kadtong giingong mga testigo nga nalambigit kintahay sa panikas. Kahinumdoman, nitunga kining giingong mga testigo nga gitaptapan sa usa ka press conference.
Apan nabonggo sa ngadtongadto nga gikuha lang diay sila diha sa Mambaling ug titaptapan alang sa camera.
Dugay na kitang nakahibawo niini. Ug usbon ko nga di ko motuo nga wa suginli ang senadora sa maong hitabo dinhi sa Sugbo.
Bisan pa man, di ko makahinumdom nga nangayo siyag pasaylo sa iyang pasangil nga ang mga Sugboanon mismo ang nanikas aron mapildi ang iyang amahan.
Kaniadtong 2013, akong dakong pagtuo nga dunay mga Sugboanon nga namotar kaniya tungod kay gidala man siya sa Liberal Party ug ni PNoy.
Apan karong si Poe nga ang gusto nga mopadayon sa gisugdan sa iyang amahan, di ba angay na siyang mangayog pasaylo?
Ang nakapait lang kay kon karon na niya kini buhaton, moguwa na hinuon nga si Senador Grace Poe molitok lang og pasaylo kay nangampanya na.
Mas pait kay wa pa man gyud siya molitok niini. Imbes siya ang mangulitawo kanato pinaagi sa pagbakwi sa iyang mga pasangil, kita na hinuon ang iyang papasayluon?
MGA DURANO
Daghan ang naintriga dihang gituyo ni Sen. Grace Poe ug Chiz Escudero pagimbitar si Mayor Nito Durano sa Syudad sa Danao ug lider sa bantogang Durano clan diin nasakop si Bise Gob. Agnes Magpale, Kalihim Rene Almendras, Kong. Ace Durano, ug pipila ka mga sakop sa Hunta Probinsyal.
Gituohan na man gud nga ang mga Durano ug ang ilang lokal nga partido nga mao ang Bakkud naa na sa kampo sa Liberal Party nga gipangulohan nilang Gob. Junjun Davide ug Kalihim Mar Roxas.
Gituohan sab nga ang mga Durano mao ang nagdala og ligong organisasyon sa kampo ni Davide batok sa giporma karon ni kanhi GSIS Manager Winston Garcia.
Ang kampo ni Winston, nga gilantaw nga maoy umaabot nga lider sa kampong PoeEscudero dinhi sa Sugbo, nakapanghinaway sab kang Magpale.
Mao nga unsa mang pagkahitaboa nga nakuyog man si Mayor Durano sa usa ka press conference nilang Poe ug Escudero?
NANGULITAWO
Matod pa sa usa nako ka ambungang duwende, nagsugod na pagpangulitawo ang mga danggit. Ug suod usab sila ni Kong. Ace Durano ug si Escudero.
Kahinumdoman, pareho kini silang sakop sa Nationalist People’s Coalition (NPC). Bisan pa man og si Ace nahimong usa ka Cabinet member samtang si Escudero naa sa oposisyon sa panahon ni GMA, wala napapas ang ilang panaghigalaay ug pagkasakop sa usa ka partido.
Nagpasabot ba kini nga magPoeEscudero na ang mga Durano?
Sa akong pangagpas, mohilom lang ang Bakkud niini hangtod sa ultima ora. Apan ang ilang desisyon magagad sa kahimtang dinhi sa lokal.
Ug gawas sa kahimtang sa lalawigan, angayan sab natong tanawon kon unsay mahitabo sulod mismo sa ikalimang distrito. Pananglitan, modagan ba si outgoing mayor Duke Frasco sa Liloan alang sa pagka kongresista? Moatbang ba ang asawa ni Duke nga anak ni Kong. Gwen Garcia sa bise mayor nga bago lang nitapon sa Bakkud?
Bisan pa man, di ko mahibong kong sa sunod nilang bisita sa Sugbo, moabot sila si Roxas ug PNoy sa Syudad sa Danao sama sa nahitabo kaniadtong 2013.
Ug nganong di man nga dako man kaayo ang command votes diha sa distrito?