Mga pumpkin o melon?
ANG akong amahan nasurprisa kay nga ang mga liso sa pumpkin nga iyang gitanom sa miaging tuig mitubo sa tunga-tunga sa dapit sa melon. Maayo og tubo ang mga melon—mao usab ang mga pumpkin. Maayo kaayo, gani, nga ang akong amahan gusto nga magpadayon og tubo ang mga pumpkin. Apan siya nasayud nga kon buhaton niya kini, ang mga pumpkin mopugong sa pagtubo sa mga melon.
Mao nga kinahanglan siyang mopili. Mahimo niyang ibton ang mga pumpkin aron ang melon dunay mas maayong higayon sa pagtubo o pasagdan ang pumpkin nga motubo ug posibling mopig-it sa mga tanom nga melon, nga makapakunhod sa abut sa duha. Mga pumpkin o mga melon? Kini nga pagpili tali sa duha ka maayo nga mga opsyon.
Sa pagtimbang-timbang sa duha, ang akong amahan mihukom sa pag-ibut sa mabungahong tanom nga pumpkin. Dili lamang nga ulahi kini mitubo, apan siya mihukom nga gusto niya ang giplano nga mga melon labaw pa kay sa iyang gusto sa surprisa nga mga pumpkin.
Kini nga kasinatian nakaaghat kanako sa paghunahuna mahitungod sa mga pagpili nga atong himoon, ilabi na sa atong mga pakigrelasyon sa uban. Bisan sa atong mga higala, atong employer, o kadtong atong minyoan, kon ang pagpili tali sa duha ka maayo nga mga butang, ang pag-ila sa husto o labing maayo nga opsyon usahay lisud.
Sa kinabuhi, pipila ka mga pagpili nga atong giatubang sa kasagaran dili importante, sama sa, unsa nga pagkaon ang akong kan-on sa pamahaw? Kon mag-atubang og pagpili tali sa duha ka maayo nga mga butang, tingali mahimo natong buhaton sama sa gibuhat sa akong amahan ug mangutana, “Unsa man ang mas bililhon nako?” Dayon maghimo og desisyon ug magpadayon diha sa hugot nga pagtuo, magsalig sa Ginoo sa pagkorihir kanato kon kita masayop.
Apan ang pipila ka mga pagpili importante kaayo. Si Presidente Thomas S. Monson miingon: “Ang mga desisyon anaa kanunay sa atong atubangan. Aron sa paghimo niini sa maalamong paagi gikinahanglan ang kaisug—ang kaisug nga mosulti og dili, ang kaisug nga mosuti og oo. Ang mga desisyon mao ang motino sa kapalaran. Kon mag-atubang niining mga matanga sa mga pagpili, ang usa ka mas maayo nga ipangutana mao ang, “Unsay mas bililhon sa Ginoo?” Kon kita nasayud sa tubag niana nga pangutana, ang kinahanglan natong buhaton mao ang pagpahiangay sa atong mga mithi sa Iyaha ug dayon sundon kana nga pagpili. Sa kanunay kini mao ang sakto.