Kugi ug pag-ampo ang puhonan
ANG kababayen-an may kapasidad nga makatabang sa pamilya samtang nag-alagad sa mga mahal sa kinabuhi. Kini akong napamatud-an sa akong kaugalingon.
Ako diay si Mary Jane Navares, 41, ug may tulo ka mga anak. Ang akong kapikas mao si Nelson Navares, usa ka conductor sa minibus. Kami nagpuyo sa Tapok, Bolinawan, Carcar, Cebu. Ang among pagpuyo sakto ra intawon nga makakaon kami sa inadlaw-adlaw. Dako ko og damgo alang sa akong mga anak. Gusto nako nga sila makahuman sa ilang pagtungha kay kana ra ang akong mapabalon kanila. Maong naninguha ko nga makatabang sa akong bana nga naa pud koy panginabuhian kay lisud kung siya ra usa ang naninguha.
Una nakong gisudlan mao ang saristore pero gamay ra og kita ug dili makasapar sa mga kinahanglanon sa akong mga anak nga anaa pa sa elementarya niadtong panahona. Maong 2008 naaghat ko nga moapil sa Micro-finance nga programa sa Ramon Aboitiz Foundation Inc. Gipahuwam ko og capital nga akong gigamit sa pagnegosyo. Naa pud silay mga training nga gihatag nga nakadugang sa akong kaalam kabahin sa pagnegosyo ug unsaon kini pagpalambo. Ang una nakong huwam kay Php3,000 ang kantidad. Dako na kaayo ning natabang kay nakasugod ko pag-abli sa akong carenderia.
Subay sa akong nakat-onan sa training, akong gipatuyok ang halin sa carenderia hangtud nga nadugangan ang akong negosyo og mga tinda sa sari-sari store ug nagkadaghan sab ang akong mga suki. Ang maong kalamboan dako kaayo og natabang sa pagtubag sa panginahanglanon sa among pamilya.
Anaa na ako karon sa ika-14 nga cycle sa akong pagpanghuwam sa Micro-finance ug dako na nga kantidad ang mahimo nakong hulamon. Nagbuy and sell sab ko og bugas ug nagbuhi pud ko og anay nga baboy.
Dako ang akong pasalamat sa Kahitas-an kay wala kami Niya biyai sa panahon sa among kalisod, maong suklian ko ang maong kaayo pinaagi sa tumang paningkamot aron mahatagan nako og maayong kaugmaon ang akong mga anak. Karon, akong garbo ang pagsulti nga napahuman nako ang akong usa ka anak sa pag-eskwela sa kursong BS Information Technology. Sa laing bahin, ang akong duha ka mga anak nagtungha pa sa kolehiyo sa kursong BS Mechanical Engineering ug sa Criminology. Tinuod dili lalim makigbugno sa kapalaran apan mawala ra man ang akong kakapoy makakita sa akong mga anak nga naningkamot ug nagtarong sa ilang pag-eskwela.
Dili jud sayon ang pagpahuman og estudyante sa college ilabina nga nagdungan silang tulo sa college, 4th year, 3rd year ug 1st year. Nagtinabangay lang gyud mi og paningkamot sa mga trabahuonon sa balay ug sa among negosyo. Nagpasalamat lang pud ko kay nitabang ang akong mga anak sa pagbudget sa ilang allowance kay usahay moingon sila nga naa silay natigom ug dili sa sila mangayo kon nakabantay sila nga wala nakoy kwarta.
Mapasalamaton sab ako sa akong bana sa iyang kakugi nga momata og sayo aron mangompra sa akong lutuonon sa dili pa siya moadto sa garahian para mangundok og minibus nga Carcar-Cebu City ang rota.
Karon, daghan na og kausaban sa among pagpuyo pero nagbilin gihapon kami nga yano sa among pagpuyo ug moserbisyo sa katawhan.
Ang akong ikapaambit sa uban nga gustong molambo ang ilang panginabuhian mao ang pagkugi ug magsinuportaay ang matag sakop sa pamilya. Dili sab gyud makalimot sa pag-ampo ug magpasalamat sa grasya nga gihatag sa Kahitas-an.
Mapasigarbuhon si Mary Jane Navares nga ang iyang kakugi ug pagampo gisuklian og grasya sama sa paglambo sa iyang sari-sari store ug pagkadugang sa pagpamuhi og baboy sa iyang mga negosyo.