Stay with me
(Ikaunom sa pito ka mga gula)
WA gyud dayon ko makatingog sa gisulti ni Christopher. Nanawag man gud siya nako sa selpon bisag buntag pa kay nagpakisayod kon unsay gisulti ni Margie bahin sa pagpakigbuwag niini kaniya. “Nagtuo na ko nga dunay laing lake ang involve kon nganong kalit nga nawa’a ang love ni Margie nako, Lann. Wa gyud ko masayop nga third party ang rason. Pero dawaton ko na lang gyud ni. Naa ka man sab.”
Sa tingog ni Christopher namatikdan nako nga kahilakon siya. Pero wa ko magtagad ani. Maoy diha sa akong hunahuna ang iyang giingon. Nakalitan gyud ko.
“U-Unsay buot ipasabot anang imong giingon, Chris?” Dinhi pa ko nakatingog. Kalit kong gikulbaan. “Nga naa ka, nga kanunay magdasig nako, nga kasultihan nako sa akong mga kaguol. You’re my friend. Ikaw ra gyud ang akong kasumbongan aning tanan.”
Morag nahuwasan ko sa kakuyaw. Nakakatawa ko sa hilom. Ako ra diay ang naghatag og laing kahulogan sa gisulti ni Christopher.
“Aw, sakto sab, uy, Chris. As a friend, mahimo ko nimong kasultihan anang imong mga kaguol ron.”
Pero nahibulong ko sa akong kaugalingon. Wa mawala ang gibati kong kakulba. Kalit lang kong nahinumdom sa giingon ni Jude nako.
“Basig maparehas ka kang Margie, Lann, mokalit lang sa pagpakigbuwag nako kay nahigugma kag laing lake.”
Morag nia gihapon sa akong hunahuna ang maong mga pulong ni Jude. Naunsa ba ko, uy? Nganong gikulbaan man ko? “Pangita lag laing g-girl, Chris, aron makalimtan nimo si Margie.” “Moabot ra tingali nang panahona, Lann.” Dugay-dugay nang nahunong ang among pag-estoryahay ni Christopher sa selpon pero morag wa ko sa akong kaugalingon. Wa gyud ko makasabot sa akong gibati niadtong tungora. Morag kalit nga dunay laing pagbati nga nasulod sa akong kasingkasing. “God!” Hilom kong nakaingon. Tibuok adlaw nga wa masulod sa akong hunahuna ang gileksyon sa akong mga propesor sa eskuwelahan. Si Christopher gihapon ang akong gihunahuna. Morag nalipay ko nga nagkabuwag sila si Margie. Hilom kong naglagot sa akong kaugalingon. “Hoy! Lannie, duna ka nay uyab! Naglaom si Jude nimo!” Hilom kong gikasab-an ang akong kaugalingon.
Gipukpok ko sa akong kumo ang wala kong dughan, ang dapit sa akong kasingkasing. Unya nanghupaw ko.
Usa ka gabii, namisita si Christopher nako. Nalipay ko sa iyang pag-abot. Maayo kaayo ang gipakita kong tinagdan niya samtang nag-atubang mi sa sala. Ug namatikdan ko nga malipayon sab siya.
(TAPUSON SUNOD GULA)