Resulta sa Cesafi football finals

HUMAN sa lima ka mga tuig, nakampiyon pagbalik ang University of Cebu sa Cebu Schools Athletic Foundation Inc. (CESAFI) football event tungod sa ilang goalkeeper nga si Arvin Perez, kinsa mipadaog kanila batok sa University of San Jose-Recoletos kagahapon pinaagi sa shootout, 6-5, sa Cebu City Sports Center.

Human sa 90 minutos, tabla ang duwa ug nagtabla gihapon kini pagkahuman sa 30- minute extension hinungdan nga niabot sa penalty shootout.

Wala’y mintis ang tanang lima ka mga keeper sa duha ka teams ug tabla na sab ang duha ka mga kampo, 5-5, hinungdan nga napugos ang sudden death shootout.

Ang first kicker sa sudden death sa UC nga si Ralph Plaza yano ra’ng niwani sa goalie sa USJ-R nga si Luke Amaba para makaabante.

Sa iya nang turno nga modepensa sa goal, niduol si Perez sa penalty area ug gikuptan kadali ang bola nga daw adunay giyawyaw.

“Ma- save nako ni, ma- save nako ni,” ang sulod sa hunahuna ni Perez niadtong higayuna.

Tuod man, nasagang ni Perez ang patid ni Jason Calunsag ug kalit nga naninggit dungan sa pagdagan ang mga magduduwa sa UC sa tumang kalipay.

Niangkon si Perez nga nasagmuyo siya sa shootout dihang wala siya naka- save og bisan usa lang sa lima ka mga patid.

“Na- down gyud ko pero na- motivate ra sad ko tungod sa akong mga kauban ug coaches,” batbat ni Perez. “Proud kaayo ko nga napa- champion nako ang UC.”

Sa iyang bahin, si UC coach Glen Ramos niangkon nga aduna siya’y kumpiyansa sa iyang mga magduduwa sa kulbahinam nga shootout.

“Sa among last practice, nag- anticipate naman ko nga mag- shootout. So ang among warm up kay penalty. Naa koy confidence sa mga bata kon moabot mi’g shootout,” ingon ni Ramos.

Sa premirong duwa, gipildi sa University of San Carlos ang University of the Visayas, 1-0, aron langkaton ang third place trophy.