Poste natumba: 1 patay

PATAY ang usa ka tanod samtang naangol ang kaubang konsehal human matumbahi og poste sa Sitio Lutao, Barangay Estaca, lungsod sa Compostela niadtong Sabado sa hapon.

Sa imbestigasyon sa kapulisan, ang natumbahan sa poste mao sila si Bernardo Calvo, 47, ug Raul Castro, 52, human masabod sa trak ang mga wire nga nagkumbitay sa poste.

Si Calvo dali nga gidala sa Danao Provincial Hospital apan gideklarar ni Dr. Evangeline Andiza nga patay na dihang nahidangat sa ospital gumikan sa nahiaguman nga kadaut sa iyang ulo ug ubang bahin sa lawas.

Si Castro, usa ka konsehal sa Barangay Estaca sa Compostela, gidala sa Mendero Hospital sa lungsod sa Liloan.

Wa kini panimuot dihang nahidangat sa emergency room, matod sa mga pulis.

Nakaangkon usab kini og kadaut sa iyang ulo.

Sa wala pa mahitabo ang insidente sa alas 5 sa hapon, matod ni SPO4 Ernesto Pepito sila si Calvo ug Castro nakitan pa nga nag-abag sa linemen sa usa ka electrical company nga nagayo sa mga wire.

Usa ka 18-wheeler nga tractor truck nga gimaneho ni Alejandro Monsanto, 41, niagi ug nasabod sa ibabaw nga bahin sa sakyanan ang mga wire ug naguroy ang kongkreto nga poste ug natumba ngadto nila ni Castro ug Calvo.

Ang mga testigo niasoy sa kapulisan nga ang trak nga anaa sa southbound lane, kusog ang dagan.

Si Aranelo Batucan, lineman, nisulti sa mga pulis nga usa ka telecommunication company ang tag-iya sa poste.

Si Monsanto nabilanggo karon sa Compostela Police Station.

Hayan mag-atubang siya og reklamo nga reckless imprudence resulting in homicide and serious physical injury kon way makab-ot nga kasabutan tali sa kompaniya ug kabanay sa mga biktima.

Samtang, padayon ang imbestigasyon sa awtoridad ning adlawa sa insidente nga nikalas og kinabuhi sa usa ka alagad sa barangay tungod lang sa poste.