Duha ka kalampusan
“PAYTS bisag lupig, Fred!” mao kini ang dasig kanako sa akong maestro sa History sa ‘fourth year’ sa Tabogon Roosevelt High School nga si Sir Bernard. Usa ka pamunto sa iyang sinultihan nga nagdasig nako kanunay sa pagtuon sa akong mga leksiyon sa tanang mga ‘subject’ aron maoy mogulang balediktoryan sa graduating class.
Nasayod si Sir Bernard nga daghan kong kumpetensiya sa honor roll sa mga ‘ graduating student.’ Ug maoy gusto niya nga akoy mahimong balediktoryan kay nasayod man siya nga anak ako sa kabos nga ginikanan sa among sityo sa Candangas nga nahisakop sa baryo Caduawan, lungsod sa Tabogon. Ang akong ginikanan dili na makaabaga sa galastohan sa akong pag-eskuyla sa kolehiyo. Mas kinsuylo kon ako maoy ma-balediktoryan kay klarong makapadayon ko pag-eskuyla sa kolehiyo kay makapahimulos man ko sa ‘full scholarship’ sa kolehiyo.
“Sa tanang mogradwar karong tuiga, Fred, si Ledesma ang higpit mong karibal sa pagka valedictorian. Kinahanglan doblihon mo ang imong kakugi sa pagtuon aron maka-payt ka niya,” matod ni Sir Bernard usa ka higayon niana nga nagkasultianay mi.
Hawod sa klase si Ledesma. Hait og salabutan sa tanang mga subject. Siya sab maoy usa sa nakapadasig nako sa dugang pagtuon sa akong mga leksiyon, ilabi na kay hilom akong nahigugma kaniya. First love ko siya. Sa edad nga 16 siya maoy unang babaye nga gipitik sa akong kasingkasing sa natad sa gugma. Magbutok-butok ang akong dughan kanang magkasugat ang among tinan-awan sulod sa klase. “Payts bisag lupig, Fred! Kumbati gyud. Panguyabi si Ledesma!” laing dasig kanako ni Sir Bernard.
“Okey, Sir. Payts bisag lupig! Payts sa pagtuon, payts sa pinansyal nga problema, ug payts sa gibating gugma!” paundayon nako kang Sir Bernard.
Gipanguyaban ko si Ledesma. Bisan natugkad ko nga parehas ming ‘in love’ sa usag usa, wa ko siya apretaha sa pagtando kanako. Miingon si Ledesma nako nga sa gradwasyon namo iyang ihatag ang iyang hukom kon sugton ba ko niya o dili.
Dako gyud kaayo ang akong pagpasalamat kang Sir Bernard tungod sa iyang mga pulong sa pagdasig kanako. Payts bisag lupig! Tungod niini nadasig ko sa pag-pukos sa akong pagtuon sa akong mga leksiyon aron makalahutay sa pag-eskuyla ug sa unang higayon nakasulay kog panguyab.
SA AMONG gradwasyon ako ang nahimong ‘valedictorian’ ug si Ledesma maoy ‘salutatorian.’ Ug misamot ang akong kalipay dihang gisultihan ko ni Ledesma sa iyang hukom kalabot sa akong gihalad nga gugma kaniya. Iya kong gisugot. Milumpat ang akong kasingkasing sa tumang kalipay. Naangkon ko ang duha ka kalampusan: ang akong pagka balediktoryan ug ang gugma ni Ledesma.